Padayon ang kangitngit sa Bohol?

Padayon Bohol, Padayon Bol-anon matod pa. Apan ang standard-bearer nga si Kong. Arthur Yap kay gilambigit sa fertilizer scam, rice smuggling, ug pork barrel insertion karon nga gituki ni Sen. Ping Lacson.

Nagpasabot ba kini nga giduso ang pagpadayon sa kangitngit sa Bohol? Ang Sandiganbayan mismo niduso sa paghusay ni Kong. Yap sa tersero distrito sa Bohol ug kanhi Agriculture Secretary Luis Lorenzo Jr. tungod sa anomalosong pagpalit og mga fertilizer nga moabot og P46.45 milyones.

Sa usa ka resolusyon nga pinetsahan og Agusto 9, gibasura sa sixth division sa Sandiganbayan ang pipila ka mga mosyon nilang Yap ug Lorenzo nga ipalusaw ang mga kasong pangurakot. Nag-atubang ang duha og lima ka kalapasan sa Section 3e sa Anti-graft and Corrupt Practices Act.

Nitumaw ang maong kaso gumikan sa pag-facilitate ni Yap nga hepe niadtong tungora sa National Food Authority (NFA) sa pagpalit og 92,158 ka sako sa fertilizer gikan sa Phosphate Fertilizer Corporation (Philphos) sa miaging 2003.

Walay public bidding nga nahitabo alang sa maong transaction samtang ang mga lagda alang sa negotiated mode of procurement wa na mosubay sa invitation of suppliers.

Sibaw sab ang mga kontrobersiya kabahin sa rice smuggling sa panahon nga hepe sa NFA si Yap ug dihang nahimong Agriculture Secretary.

Taas-taas nga diskusyon kining kabahin sa rice smuggling mao nga igahin nato sa laing lindog.

Sa pagkakaron, atong hisgutan kining kaso nga gisang-at batok kang Yap sayo niining tuiga tungod sa usa ka kasong gisang-at sa Ombudsman batok niya, uban sa pipila ka opisyal sa Philippine Rice Research Institute (Philrice), tungod sa usa ka anomalusong car plan nga moabot og P15.8 milyones.

Ang maong kaso naglambigit sa usa ka car plan alang sa mga empleyado sa Philrice nga giingong di pabor sa kagamhanan.

Ang Ombudsman nipasangil kang Yap ug walo ka opisyal sa Philrice nga nipirma sa usa ka car plan kaniadtong 20082009 nga nisugot nga makautang ang 10 ka mga empleyado gikan sa PNB nga gigarantiya sa pundo sa Philrice.

Karon, nalambigit na sab kining si Kong. Yap sa gituki ni Senador Ping Lacson sa giingong anomalusong insertions sa 2019 budget nga gituki karon sa Senado. Matod pa sa usa ka kulomnista sa kaulohan, dunay P2 bilyones nga insertions si Kong. Yap. Apan gihimakak kini sa kongresista.

Nagpasabot ba si Kong. Yap nga wala siyay labot sa giangkon ni Deputy Speaker Rolando Andaya Jr. nga dunay 99 ka mga kongresista nga mas dako pag insertions ni Speaker Gloria Macapagal-Arroyo nga P1.9 bilyones?

Mas gamay diay sa kang Arroyo ang insertions sa iyang sinaligan nga si Yap? Lalim bay, si Yap ang giilis ni Arroyo kang Deputy Speaker Gwen Garcia. Ingon niana ka gamhanan ang Yap. Unya, wa siyay insertions?