Mga dagkong tawo
Kining pulong “dagkong tawo” gikan kuno sa mga mga isla diha sa halapad nga lugar sa “Pacific Ocean” diin ang mga dakodako sagad mga tawo nga may dakong hikay ug magpabawon pa gyod. Dagko pod ni silang mga tawhana kay ang kinaon mga matang sa gamot sa tanom nga daghan og “carbohydrates”. Napasa kining maong pulong sa atong kultura ug ang gipasabot mao ang mga tawo nga tungod sa ilang posisyon, katigayonan, ug koneksyon adunay gahom nga labang sa kasagaran. Mga dakong tawo kini sila.
Daghang dagkong tawo ang gihisgotan sa ebanghelyo. Si Tiberio Cesar mao ang labing dakong tawo niadtong panahona kay siya ang nagmando sa tibuok kalibotan nga gisakop sa Roma. Nagpadayon si Lucas: “Si Poncio Pilato mao ang gobernador sa Judea, si Herodes mao ang tetrarka sa Galilea, si Felipe, iyang igsoon, tetrarka sa kayutaan sa Iturea ug sa Trakonite, si Linanias tetrark usab sa Abilena.” Ang “tetraka” nagmando sa ikaupat nga bahin sa gibiling gingharian ni Herodes ang Bantugan. Mga anak niya kini ug mga dagkong tawo pod.
Gihisgotan usab ang mga dagkong tawo sa natad sa relihiyon: ang pangulong pari nga si Anas ug ang iyang umagad na lalaki nga si Caifas. Gitudlo kini sila sa maong puwesto sa mga Romanhon. Nahimo kini silang mga kaatbang ni Jesus ug maoy nangulo sa pagsupak kaniya.
Taliwala niining mga dagkong tawo adunay mitumaw nga usa ka tawo nga tungod Binasi sa Baruc 5:1-9; Salmo 126; Taga Felipo 1:4-6, 8-11; Lucas 3:1-6 sa gahom sa Dios minglupig niining mga dagkong tawo: “Miabot ang puong sa Dios kang Juan nga anak ni Zacarias didto sa kamingawan.” Didto siya “sa tibuok kasikbit sa Jordan samtang nagasangyaw sa bunyag sa paghinulsol alang sa kapasayloan sa sala.” Gibatonan niya ang papel sa “tingog sa nagasinggit didto sa kamingawan, ‘Andama ninyo ang dalan sa Ginoo.’” Pinaagi ni Juan gipangandaman ang dalan sa Dios diha sa panghinulsol. Lupig silang tanan sa pagkadakong tawo ni Juan kay instrumento siya sa Labawng Makagagahom.
Sa libro ni propeta Baruc ang mga tawo nga naut-ot diha sa ilang pagkagihinginlan gibayaw na sa Dios. Gipabarog ug gipundok pinaagi sa “pulong sa Balaan, nagmalipayon kay gihinumdoman sila sa Dios.” Nahimo na silang mga dagkong tawo tungod sa Dios ug dili tungod sa ilang nabuhat, kay wala baya.
Sa laing bahin, diha sa sulat ngadto sa mga taga Felipo, gipunting ni Pablo ang tinuoray nga makapadakong tawo: “Ang inyong gugma molambo pa gayod diha sa kaalam ug sa tanang matang sa pagsabot, aron makaaninaw unsa ang bililhon.” Ang pag-aninaw nga tinukmod sa gugma maoy makapadakong tawo kanato sa mata sa Dios. Iya kining mga gasa.
Diha lamang sa gugma sa Dios nga mao si Jesus matagamtaman nato ang atong pagkabililhon.
Unsa may atong pagahimuon aron labaw pang molambo si Jesucristo sa atong kinabuhi, ang labing hingpit nga Dakong Tawo?