HOTSHOTS 3-0 ANG TINGUHA
Duwa karon 6:30 pm- Magnolia batok Alaska Bitbit ang nagbukal nga kadasig, ang Magnolia Ang Pambansang Manok Hotshots mosuway pagposte og dominanteng 3-0 nga bintaha sa ilang pagpakigbatok og balik sa Alaska Aces karong gabii sa Game 3 sa Philippine Basketball Association (PBA) Governor’s Cup finals series sa Ynares Center sa Antipolo City.
Nakaposte na man tuod og 2-0 nga bintaha ning best-ofseven nga kombati, giklaro sa Hotshots nga dili pa lalim ang kinahanglan nilang sagubangon aron masakmit ang kampiyunato.
“Hindi mo maramdaman ang lamang dahil ang hirap ng laban. At alam mong mas mahirap pa ang susunod na laban,” matod sa usa sa mga pambato sa Magnolia nga si Paul Lee sa interbyu sa PBA.PH.
“Sa totoo lang, eto ang pinakamahirap na series na nilaro ko. Pareho kasing pume-press and so hindi ka pwedeng mag-relax, at talagang mahirap.”
Sa Game 1, ningdaog ang Hotshots, 100-84, unya gisundan kini nila og mas laing kadaugan sa Game 2, 77-71.
Taliwala sa kasamtangan nilang sitwasyon, ang Aces malaumon gihapon nga mausab nila ang dagan sa series.
Gipasabot ni Alaska coach Alex Compton nga kinahanglan lang nilang malimitahan ang ilang turnovers aron makabawos sa Hotshots.
“That’s the prime story of the first two games of the series,” batbat ni Compton.
Sa Game 2, 26 ka turnovers ang namugna sa Aces.
Sa nag-unang duha ka mga duwa, aduna unta’y mga kahigayunan ang Aces nga angkunon ang kadaugan apan nabaraw kini sa ilang turnovers.
“That game was what I expected Game 1 to be like, and expected the series to be,” pasabot ni Compton.
“But if we turn the ball over 26 times, that’s just huge. I just think that we better take care of the basketball.”