TIPIK SA CICC NAHAWAN NA GIKAN SA MGA NAGPUYO
Wa nay mga barong-barong sa atubangan ug sa walang kilid sa Cebu International Convention Center (CICC) sa may North Reclamation area sa Dakbayan sa Mandaue.
Si Anecita Lumbay, 62, kinsa tig-agian sa kilid sa CICC kon padung sa mall atbang niini, gikan sa iyang balay nga nahimutang mga 100 metros ang gilay-on gikan sa CICC , nitug-an nga wa na siyay matimahuan nga baho gikan sa CICC compound.
Gani hayahay na ang hangin tungod usab sa presensya sa mga tanom.
Sa pagduaw sa Superbalita Cebu sud sa compound sa CICC, bugtong ginagmay nga salin nga kahoy, trapal, ug pipila ka mga salin sa pagguba sa barong-barong ang nahabilin.
Mao na kini ang makita sukad sa pagsugod sa Disyembre ning tuiga, human nga ang kapin sa 100 nga gihulagway nga mga nag-abang ug extended family na sa mga nasunugan sa Barangay Mantuyong ug Guizo, ang uban niuli na sa ilang probinsya.
Matod ni Atty. Elaine Bathan, chief of staff to the Mayor’s office sa Mandaue City, nga wa na nagmagahi pa ang uban kanila human nidawat na sa pinansyal nga hinabang ug gihatod pauli sa ilang kalungsuran.
Bugtong nahibilin sa tuong kilid sa CICC compound ang 288 ka mga benipisyaryo sa relocation site sa Barangay Casili, nga gikatakdang balhinon karong Enero.
Apan ang pagbalhin magdepende kon uyunan sa konseho atol session karong hapon, Disyembre 12, ang pagsud ni Mandaue City Mayor Luigi Quisumbing og kasabutan tali kang Pio Castillo, kinsa maoy nag-abang sa luna sa Mandaue City Government sud na sa pipila ka tuig sa Brgy. Opao.
Ang maong luna ang i-land swap sa gipanag-iya ni Castillo nga kapin sa duha ka ektarya nga yuta sa Barangay Casili nga maoy balhinan unta sa mga nasunugan, matod ni Bathan nga gigastuhan na ni Castillo alang sa site development ug re-blocking.
“Right now, it is pending before the City council and we are hoping nga mahatagan og pagtagad sa konseho ang request ni Mayor. Ang concept man gud sa land swap, there would be a property in Opao, that is owned by Mandaue, for which nahimo nga beneficial owner si Mr. Pio Castillo, after leasing it for several years. It is more or less 5,000 sq. meters. Mr. Castillo bought a property in Casili consisting more than two hectares. Aside sa pagpalit, he also spent for the site development and preparation and reblocking para na ma-ready siya sa pagbalhin sa atuang informal settlers,” matod ni Bathan.
Matod ni Bathan kundi uyunan sa Konseho, mangayo siya niini og sugyot kon asa sud sa Syudad sa Mandaue pabalhinon ang 288 ka mga biktima sa sunog nga sud na sa dul-an tulo ka tuig diha sa CICC compound.
Dugang pasabot ni Bathan nga ang land swapping usa sa nakita sa kagamhanan nga mas maayo ug mahatag ang hangyo sa mga hingtungdan nga mobalhin nga su’d lang gyud sa Mandaue City.
“The City doesn’t have its own area nga suitable for relocation. Second, ang land values nato sa Mandaue is relatively high already and that if we will have to purchase the property, it will have to go for a tedious procedure and will have to look into the budget,” matod ni Bathan.
Karong hapon ang maong hangyo sa mayor ang usa sa tukion sa regular session sa Mandaue City Council.