Mga anak bantayi: CSWD

Giawhag sa City Social Welfare Development (CSWD) sa dakbayan sa Lapu-Lapu ang mga ginikanan sa pag-monitor sa ilang mga anak nga menor de edad, hilabi na ang paggamit niini sa social media.

Kini human sa nahitabo sa usa ka 13-anyos nga babaye sa miaging semana nga giingong nakighilawas sa iyang nakaila sa internet.

Gumikan sa tumang pagsalig sa teenager sa lalakeng iyang nakaila, nagbuhat sila og sex video, apan wa niini damha nga mokatap ang video sa social media.

Matod ni Ermilita Degamo, pangu sa CSWD, nga sayod sila sa grabeng impluwensya karon sa social media sa kabataan hinungdan nga ang mga ginikanan angay kanunay nga mopahimangno sa ilang menor de edad nga mga anak sa mga ginadili sa socal media ug internet hilabi na ang pakig ila-ila o lain-laing tawo nga maguwang og mga edad.

Giangkon ni Degamo nga pipila sa mga ginikanan di makamao mogamit sa social media hinungdan nga posibleng mao usab kini ang hinungdan nganong di sila maka monitor kanunay sa lihok sa ilang mga anak.

Apan alang kang Degamo, di kini igong rason aron pasagdan ang ilang mga anak.

Nunot sa hitabo, posible nga mopahigayon og parenting seminar ang ilang buhatan kalabot sa social media aron mas mapahimangnoan pa ang mga ginikanan sa mga angay buhaton nga malikay nga mabiktima sa binuang ilang mga anak.

“Ang social media dako kaayo na, it can make or break your name. So, gikinahanglan gayud nga ang gikan sa atong barangay, mga pamilya mga ginikanan, ato jud nang giawhag nga ang mga ginikanan number 1, i-monitor jud na nato ang kabataan.”

“Kinahanglan mag-monitor jud unsa na siya para makabawo sila unsay angay nga buhaton aron mapugngan nga adunay mga panghitabo nga dili angayan para sa mga kabataan,” ni Degamo sa Superbalita Cebu.