UP bukas sa pagpaabang

Moduso ang University of the Philippines (UP) Cebu ngadto sa Cebu City Government ug sa mga biktima sa sunog og usa ka win-win nga solusyon sa gibana-banang 2.5-3 ektaryang kontrobersyal nga luna human sa dakong sunog sa Purok 3, Brgy. Kamputhaw niadtong Disyembre 5, 2018.

Matod ni UP Chancellor Liza Corro nakasabot ang UP-Cebu sa panginahanglan sa mga residente sa ilang balay nga mapuy-an, apan sa laing bahin nanginahanglan sab og lugar ang unibersidad nga matukuran sa ilang mga building.

“It’s not a question of whether or not we allow it (the re-blocking and rebuilding of houses by the fire victims), but it’s a question of how we can all help out each other here. It’s a balancing of everything and meeting half-way,” matod ni Corro.

Si Corro nipasabot nga gikwestiyon na ang UP-Cebu sa Commission on Audit (COA) kon unsa ang ilang gibuhat sa luna nga gidonar sa Cebu Province.

Nipasabot si Corro nga sa pagkakaron, kon magkasinabot sila sa Cebu City Government, mao ang pag propose ngadto sa Board of Regents nga ang maong bahin sa yuta paabangan samtang ang mahabilin igahin sa giplano nga UP faculty ug staff housing.

Base sa UP Campus Master Development Plan, ang maong luna gigahin alang sa UP faculty ug staff housing.

Matod ni Corro nga kining butanga di bag-o.

Pinaagi usab niini, ang mga residente di matawag nga informal settlers.

Iyang giklaro nga kon uyonan kini sa Board, ang pagpaabang temporaryo lang.

“I think it’s fair enough that the UP employees should also be given the oppurtunity to enjoy those lots,” dugang niya.

Giklaro ni Corro nga sa pagkakaron, wala pa sila makadawat og komunikasyon gikan sa City Government ug sa Division for the Welfare of the Urban Poor (DWUP) sukad sa pagkahitabo sa maong sunog.

“They haven’t asked for a meeting at all, as of today,” subay ni Corro.