TRO nga gipangayo ni Byron gibasura

Gisalikway sa korte ang gipangayo nga temporary restraining order ni kanhi Cebu Provincial Detention and Rehabilitation Center (CPDRC) consultant Byron Garcia ug upat ka mga kauban kabahin sa ilang pagkatangtang isip mga miyembro sa Cebu CFI (Court of First Instance) Community Cooperative.

Sa duha ka pahina nga kamandoan nga giluwatan ni Judge Alexander Acosta, presiding judge sa Branch 9 sa Cebu City Regional Trial Court, wa kini makumbinsir sa mga argumento ug mga ebidensya nga gipresentar sa mga petitioner alang sa pagisyu og TRO.

“After evaluating the oral arguments of the of the counsels of the parties and the evidences presented and admitted in evidence, this Court finds and so holds that the damages to be incurred by the petitioners are not of great or irreparable injury but more on monetary

damages,” tipik sa kamandoan sa huwes nga pinetsahan og Disyembre 7, 2018.

Ang hukmanan nibawi, nikansilar ug nilibkas usab sa giisyu niini nga ex parte TRO sud sa 72 ka oras samtang gitakda ang husay sa injunction karong Enero 16, 2019 sa alas 9:30 sa buntag.

Gawas ni Garcia, apil sa mga petitioner sila si kanhi Provincial Engineer Eulogio Pelayre, asawa niini nga si Josephine Pelayre, Jan Paolo Salvatierra ug Junifer Molijon.

Sa ilang pagtestigo sa korte, sila si Garcia ug Josephine nangangkon nga kon dili maisyu ang injunctive relief sa korte dili na sila makapadayon sa ilang aplikasyon o renewal sa ilang loan ug dili na usab sila makadawat sa ilang bahin sa interest ug dividends sa CFI nga alang nila.

Gipasabot ni Acosta sa iyang kamandoan nga wa kini makakita og kapasikaran sa pag-uyon sa application for

TRO sa grupo nila ni Garcia kay way angay pugngan ug likayan nga makonsiderar nga grave injustice ug irreparable injury.

Si Lito Astillero, vice chairman ug manlalaban sa CFI, nipahibawo nga karong Disyembre 15 na ipanghatag ngadto sa ilang mga miyembro ang bahin sa ilang dividends.

Sila si Garcia ug kaubanan niduso og injunction sa korte ug nihangyo nga pugngan ang mga director nga makasud sa ilang mga buhatan sa paghimo og mga transaksyon human sila gitangtang isip mga miyembro sa kooperatiba uwahing bahin ning tuiga.

Ilang gireklamo ang mga opisyal sa CFI nga sila si chairman Atty. Winston Garcia, maguwang ni Byron; Alma Jaranilla, Astillero, Engr. Imelda Perez ug Provincial Accountant Ramon Dumayac.

Gipasabot ni Astillero gitangtang si Garcia tungod sa grabe nga pagpakauwaw niini

sa mga opisyal sa iyang mga post sa iyang Facebook account.

“Gipa-explain na sila sa Board pero wa ka-explain. So, mao tong gitangtang sila as

members and nawala na ilang rights, benefits, and privileges. He (Byron) is out to destroy CFI, we have have to defend ourselves. Dili lang ni usa ka tawo ang CFI, it is a cooperative,” padayag ni Astillero dihang nahinabi sa Superbalita Cebu.

Si Astillero nidugang nga moabot na sa 120,000 ang mga miyembro sa CFI nga ang uban nagpakisayod na sa giatubang nga kontrobersiya niini. Ang CFI adunay kinatibuk-ang P12 bilyones nga assets hangtod sa Nobiyembre 30.

“CFI is still going strong, no need to cause for concern sa mga members,” dugang ni Astillero.