Kabilin giligsan sa kuwarta?

Bug-at gyud ang kuwarta kay sa timbang sa kulturanhong kabilin. Kamatuoran nga ingon ani ang materyal nga kalibutan. Ligsan sa kuwarta ang bisan unsa.

Ang Patria de Cebu, Sugbuanong kabilin, gub-on sa taga-Ayala nga mao ang Cebu Landmasters, Inc. (CLI). Tukoran og 14 ka andana nga hotel, 6 ka andana nga supermarket nga adunay mga retail spaces.

Abangan sa CLI ang maong mga kabtangan inigkahuman niini, nga magyaka sa yuta sa Patria de Cebu nga mokabat ngadto sa 6,672 metro kwadrados.

Matod sa balita nihatag na ganig abante nga bayad ang CLI ngadto sa Archdiocese sa kantidad nga P50 M sud sa upat ka mga tuig isip construction fee.

Sa ato pa, mabana-bana nga tag kapin sa 16 M ang abang matag tuig. Naa pay 36- katuig nga balayranan kay sa kasabutan nila 40 ka mga tuig ang gidugayon sa pag-abang.

Nagpasabot nga build, operate & transfer scheme ang kasabutan. Sa ato pa, iniglabay sa 40 ka mga tuig maangkon na ang tanan sa Cebu Archdiocese nga gipangulohan karon ni Arsobispo Jose Palma.

Matod sa akong higala mosamot kuno kadato ang Simbahan dinhi sa Sugbo. Apan giklaro sa tigpamaba ni Mons. Palma nga ang Simbahan dakog gastuhan nga giatubang karon.

Ang Simbahan diay ang nag-atiman sa masakiton nga mga pari nga retirado na. Gasto sa ospital ug dala na tingali ang funeral expenses kon di matabang.

Apan si anhing Padre Lape suma sa akong nahibaw-an, kon tinuod ba ni, nireklamo nga kuwang ang pag-atiman kaniya ang Simbahan sa iyang sakit nga nakuha human mabangga ang iyang sakyanan.

Di na nato mapangutana si Padre Lape nga naasayn sa among lungsod mahitungod niini kay tua na kay wa maayo sa maong sakit.

Hinuon, di pa man siya retirado kay bata-bata pa man. Busa may katarungan nga di kumpleto ang pag-atiman niya. Nagtuo ko nga natabangan gyud to siya wa lang kini matagbaw.

Apan di ko motuo sa findings sa CLI nga peligruso na puy-an ang Patria de Cebu nga 64 anyos lang. Nganong di pa man ipaguba ni Mons. Palma lagi ang mga simbahan nga ang kadaghanan subra na sa 200 anyos?