ALAB PILIPINAS KONTRA CHINA
Niini pa lang ka sayo, nagpanikad na ang Alab Pilipinas nga mopakita og aksyon dinhi sa Sugbo sa labing unang higayon.
Ang Alab Pilipinas nakatakdang makigbatok sa Wolf Warriors sa China karong Enero 6 sa sunod tuig alang sa ilang ikaduhang tahas sa Asean Basketball League (ABL) sa Hoops Dome sa Lapulapu City.
Nagkanayon si Alab Pilipinas coach Jimmy Alapag nga basi sa iyang kasinatian, nasayod siya kon unsa ka mahiligon sa basketball ang mga Pinoy sa kinatibuk-an apan iyang gitataw nga adunay kalahian kon anhi sa Sugbo ipahigayon ang duwa.
“There’s something different when you play here in Cebu. I’ve been playing here many times before and I’m so excited for my coaching debut here in Cebu,” matod ni Alapag sa usa ka press conference kagahapon sa Siknoy Pocherohan and Grill sa Metrosports Complex sa Lahug, Cebu City.
Ang tag-iya sa Alab Pilipinas nga si Charlie Dy nipadayag sab sa iyang kahinam kabahin sa umaabot nilang duwa sa Sugbo.
Gipasabot ni Dy nga sa miaging
season, ang Visayas partikyular ang Sugbo mao ang naghatag og labing taas nga TV rating sa ilang mga duwa.
“We are very much excited about our upcoming game here in Cebu. This is the first time we will play in Cebu and I’m sure this will not be the
last,” matod ni Dy. Nagpasalamat si Dy sa nag-organisar sa duwa nga si Andrew Teh sa paghan-ay sa kombati sa Alab Pililinas ug Wolf Warriors dinhi sa Sugbo.
Ang Alab Pilipinas, nga maoy
defending champion sa torneyo, nagpadangat dayon og makuyaw nga mensahe sa laing siyam ka miyembrong teams human nila gipanglubong og taga liog ang CLS Knights sa Indonesia, 94-67, sa premiro nilang duwa.
Sa ilang bahin, ang Wolf Warriors wala pa nakatilaw og daog sa nag-una nilang pito ka mga duwa.
Apan gipasabot ni Alapag nga basi sa ilang pagpakisusi, ang Wolf Warriors nag-ilis sa tanan nilang tulo ka imports sa tinguha nga mapalig-on ang ilang puwersa.
Ning maong season, ang ABL nagtugot sa tanang teams nga makakuha og tag tulo ka imports.
“Kailangan naming mag-focus sa game na ito expecially they changed all their three
imports,” pasabot ni Alapag. Ang Alab Pilipinas magsalig og maayo sa ilang imports nga sila si Renaldo Balkman ug 7’3” PJ Ramos, kinsa pulos kanhi magduduwa sa National Basketball Association (NBA).
Ang mga tiket nagkantidad og P300 sa upper box ug P500 sa lower box. Libre ang mga tiket sa general admission apan ang gobiyerno sa Lapulapu City ang moapod-apod niini.