Pagpadako sa plate no.

Dili nato ikalalis nga sagad sa mahitabong pagpamatay ilabi na sa pagpangambus sa bisang unsang orasa dili lang dinhi sa Sugbo kon dili lukop nasod, kanang mag-angkasay sa motorsiklo o “riding in tandem” mao gyud ang mobuhat sa maong salaod. Tungod kay kini gung motorsiklo dali ra nga makasikot-sikot ug makapamidpid daplin sa dalan sa higayon nga ang mga kriminal mo-eskapo human kini makahimo sa dugoong hitabo.

Duna man tuoy pipila lang ka mga krimen nga nasulbad nga may kalambigitan sa riding in tandem, pero kasagaran gyud way hustisya nga makab-ot ang biktima batok kanila.

Lisod ilhon ang mga tirador tungod kay kasagaran niini mag-helmet o magsul-ob man og bonnet.

Lisod usab mabasa ang plate number sa motorsiklo nga gigamit sa mga kriminal kay gawas nga gamay hanap na usab ang mga litra nga nakamarka niini.

Apan karon, aduna nay nag-ung-ong nga balaudnon sa senado nga gitawag og Motorcycle Crime Prevention Act sa 2017.

Kon hingpit na nga mahimo kining balaod, padak-an na unya ang mga plate number sa motorsiklo.

Tumong niini nga mas sayon ug dali ma-trace kon kinsa ang tag-iya sa maong behikulo nga gigamit sa krimen kay sayon na man unya basahon ang plate number.

Atong gihangop kining balaora, kay bisan tuod og dili ni makagarantiya nga mawala na gyud ang riding in tandem, at least, makapaluya ni sa mga kriminal.

Pero sa gihapon, padayon ang atong pagtuo nga ang subsub nga pagpahigayon og mga checkpoints ug ingon man istriktong operations sa mga tinugyanan sa balaod ilabi na sa mga taga Land Transportationo Office (LTO) maoy labing epektibo sa pagpakunhod ning matang sa krimen.

Unsaon man unya pag-trace kon maggamit og peke nga plate numbers ang mga kriminal?