Habalhabal suportahan

Sa among barangay sa Kalunasan sakop sa dakbayan sa Sugbo maihap lang ang nanag-iya og sakyanan nga upat ang ligid. Ang kasagaran nga makita didto mga motorsiklo diin ang uban niini gigamit sa pagpamasahero. Di kini ikahibulong tungod kay way masakyan ilabi na namong tua magpuyo sa kabungturan.

Ang rota nga nagdala sa numero 15 adto ra man magtuyok tuyok sa patag nga bahin nga maoy nahimutangan sa among barangay hall. Kini nga rota motadlas padung sa merkado sa Carbon.

Kami intawong namuyo sa kinaibabwan mobalhin og sakay sa habalhabal. Way laing gisaligan gikan pa kaniadto hangtod karon mao ra gyud ang habalhabal.

Kong wa pa ang habalhabal mag-unsa nalang ang panginabuhi sa mga tawo apil na ang gatosan ka tinun-an.

Mga napulo ka tuig na ang nakalabay usa ka dakong opisyal sa city hall kaniadto ang akong gihangyo nga butangan og rota ang dapit nga nahimutangan sa Cebu Zoo lahos na ngadto sa may Boy Scout camp.

Ang maong hangyo gipasikad sa dakong panginahanganon sa transportasyon sa maong dapit. Sa maong paagi mahimong hamugaway na unya ang biyahe sa mga senior citizen, mga bata, mabdos ug PWD. Ako siya nga giingnan nga bisan og magsugod lang og tulo ka dyip. Gihimo nakong sanglitanan ang ruta sa Plaza Housing sa Barangay Lahug. Subra kasubidahon ang maong dapit apan daghan ang nagbiyahe. Gani may operator nako nga gikasabot og nipadayag og kaandam pagpabiyahe og duha ka dyip kong may ruta nga ablihan.

Way nahitabo sa maong paningkamot kay nakasugat man sab og kakulian ang maong opisyal. Mao ni ang dakong tunok taliwa ning isyu nga ilakip ang habalhabal pagdakop human gideklarar nga ilegal ang operasyon sa Angkas.

Pila ba ka dapit dinhi sa ato nga way rota sa dyip? Puwerting daghana. Wa pay labot didto sa probinsiya. Ang Angkas ug habalhabal nagserbisyo taliwa sa kakulang sa transportasyon nga para sa masa. Inay daygon gukdon man hinuon. Kong serbisyo lay hisgutan di sila mabintahaan.

Ulan, init, bagyo, baha, linog og bisan unsa nga katalagman padayon silang nagserbisyo. Di pa ni mao. Nahibalo ba mo nga ang mga habalhabal didto sa bukid nagsilbi sab nga ambulansiya alang sa mga molopyo nga nanginahanglang dad-on sa ospital o sa clinic. . Mas daling moabot sa emergency room bisan kong way wangwang.

Duha ka semana ang nakalabay nasinati ang grabing kahuot sa trapiko sa palibot sa Cebu City Hall. Kay nagdali lagi ko pag agi sa Angkas akong gipara og way 10 minutos naabot ko sa akong distinasyon.

Ingon niana ka dali ang biyahe kay mahimo man silang moliot-liot taliwala sa nagsinardinas nga mga sakyanan nga natanggong tungod sa trapik. Kong kaluwasan ang hisgutanan akong angkonon nga duna pay daghan sa akong nasakyan ang kulang sa diskarte nga di maapiki ang biyahe batok sa disgrasya. Og mao ning bahina nga mosud ang gobyerno pagpanday og mga balaod nga manalipod sa interes sa mga sumasakay.