Taiheiyo mibubo og puhunan sa bag-ong ekipo nga mas makalikupanon
Padayon mibubo og dugang puhunan ang kahugpongang Taiheiyo sa Japan sa kahimanan niini sa paghimo’g semento sa lungsod sa San Fernando, Sugbo, nga nipakita sa dakong pagsalig sa ekonomiya sa Pilipinas.
Gibubo ang labing bag-o alang sa bag-ong baghouse filter nihulip sa electrostatic precipitator (EP) sa planta sa Taiheiyo Cement Philippines, Inc. (TCPI) nga nipakunhod sa binuga hangtud hapit sa wala na.
“Tuig na ron sukad ta migamit sa baghouse ug gikahimuot natong ipahibawo nga ang binuga nato nagdagan lang ubos sa 10 milligrams matag metro kubiko,” sumala ni Chiyuki Sugawara, senior vice
president sa operasyon sa TCPI nga tagduma sa planta.
Siya nibutyag nga ang panghaw tigbuga og 121 milligrams matag metro kubiko sa miaging tuig nga gigamit pa ang EP sukad naangkon sa TCPI ang planta niadtong 1998 gikan sa kanhi Grand Cement Manufacturing Corp.
Utlanan sa regulasyon sa gobyerno ang 150 milligrams matag metro kubiko.
“Dugang pagkunhod sa binuga sa planta maoy atong pasalig nga mamatigayon nga may halawom ang pagtagad sa kalikopan ug sa kahimsug sa atong mga kawani ug kasili-
nganang mga komunidad,” sigon ni Kazuhiko Ichizawa,
pangulo ug chief executive officer sa TCPI nga senior vice president for operations pa lang sa pagbugtaw niya sa proyekto.
Matod niya, ang paghulip sa EP og baghouse nipakunhod og maayo sa paggamit sa TCPI og kuryente nga kanunay mag-usab-usab, nga nakaapekto sa kahapsay sa EP nga naggamit og high-voltage electrostatic
charge aron makolekta ang partikulo sa gikargahang plato ug ibalik sa sistema.
Nataud sa TCPI ang baghouse atol sa tinuig nga pagpalung sa planta pagka-Hunyo sa miaging tuig ug gigamit dayon pagpadagan og balik sa planta human sa
usa ka bulan, matod ni Dwight P. Avila, tagduma sa environment and safety department.
Siya niingon nga dako og kaon sa kuryente ang EP nga maoy naingnan sa kadako sa galastuhan sa operasyon ug dali ra mangaguba ang mga mekanikal nga sangkap niini nga nakapataas pa sa gasto sa pag-mintinar. Sukwahi kini sa mga pisa nga naglihok sa baghouse nga minos ra ug namatud-an nga labing gamay ra ang galastuhan, limitado ra sa konsumo sa dinasok nga hangin ug gikusgon sa bentilador.
“Ang kabatid sa salaan nabatyagan nga moabot sa 99.9 porsyento,” dugang ni Avila.
Kini ang hinungdan nga nadawat sa TCPI ang 2018 Gawad Tugas alang sa responsabling pagmina sa kategoriyang mineral
processing gikan sa Department of Environment and Natural Resources ug Mines Geosciences Bureau sa rehiyon.
Nisunod ang baghouse sa sunod-sunod nga gipamuhunan sa Taiheiyo Cement Corporation (TCC) sa Japan alang sa TCPI.
Lakip niini ang ikawalo nga galingan, bag-ong silonganan sa klinker, 4,000 ka tonelada sa punduhanan, ug duha ka dugang nga makinang moputos ug mougmad sa galingan sa dili pa ang semento; ug ang pagpalapad sa pantalan.
Moabot sa 2.4 milyones ka tonelada sa semento ang maggama sa TCPI sa usa ka tuig, igo nga matubag ang lima ka porsyento sa panginahanglan sa semento lukop nasod.
Susama kini sa lima ka milyones nga sako matag bulan se sementong Grand Portland, Grand Pozzolan, Grand Premium ug Grand Masonry alang sa Sugbo ug sa nasod.