Lalake gusto nga kuhaan og 20 ka tuig ang iyang edad
Gibasura sa hukmanan ang hangyo sa usa ka 69 anyos nga Dutch national nga lalake sa Netherlands nga pakunhuran ngadto sa 49 anyos ang iyang edad aron molambo ang iyang lovelife.
Sa hukom sa Arnhem District Court, wa kini makakita og bug-at nga rason nga uyonan ang hangyo sa life coach nga si Emile Ratelband nga iuswag ngadto sa 1969 ang tuig sa iyang pagkatawo gikan sa 1949.
Gipasabot sa korte nga makaapekto sa pipila ka mga isyu nga mahimong atubangon ni Ratelband kon dasonan niini ang maong apelar.
Apil na niini ang espesyal nga mga katungod sama sa katungod sa pagtungha ug pagbotar ug mga pribilihiyo.
“Mr Ratelband is at liberty to feel 20 years younger than his real age and to act accordingly,” sigon sa hukom sa korte nga gimantala sa Agence France-Presse (AFP). Gidugang sa hukmanan nga nauso na sa katilingban nga ang ubang mga edaran na kay bation nga batan-on gihapon.
“But amending his date of birth would cause 20 years of records to vanish from the register of births, deaths, marriages and registered partnerships,” dugang niini. Gusto ni Ratelband nga mausab ang iyang edad kay nag-atubang siya og diskriminasyon gumikan sa iyang panuigon.
“I am a young god. I can have all the girls that I want, but not after I tell them that I am 69,” pahayag niini.
Si Ratelband namahayag nga wa niya gikauwaw ang iyang tinuod nga edad ug di usab siya gusto nga itago kini ngadto sa mga babaye nga iyang magustoan. Apan gusto lang niya nga makuhaan kini aron dili ma-discriminate sa mga babaye nga molikay niya sa higayon mahibaw-an ang iyang tinuod nga pangidaron.
Sumala niini ang iyang insaktong diet, naandan nga
exercise routine ug maayo nga panghunahuna ang naghatag niya og talagsaon nga panglantaw sa kinabuhi.
Siya naila nga motivational speaker ug magsusuwat.
Si Ratelband andam nga dili na modawat sa iyang binuwan nga pension sa tag 1,500 pounds Euro basta lang mausab ang iyang edad. /