Forgiveness

OLIVER PEPITO FLORES (Ikaduha sa pito ka mga gula)

Bisag usa ra ka subdivision sa Banawa ang gipuy-an namong tulo ni JIno ug Digna apan kami gyud si Jino ang suod kaayo since sa among pagka bata. Mao bitaw tingali nga na-develop ang among feeling sa usag usa mga dagko na mi.

Apan ang gibati ko kang Jino true love gyud, di parehas sa iyang feeling nako nga usa lang diay ka pagduwa-duwa.

“If I were you, Clarissa, sugton ko si Rommel. Buotan man sab siya. Gikan sa maayong pamilya ug di sab bentahaan sa kaguwapo.”

Igo lang kong mipakibo sa akong mga abaga.

Pagka kadlawon nanimba mi si Digna sa duol nga simbahan. Mitambong mi sa Misa de Gallo. Duna koy wish, nga unta mopauli si Jino dinhi sa Cebu. Gusto kong makigklarohay niya. Bisag nagkalagyo mi ug wa nay komunikasyon apan wa mi magkabuwag, Boyfriend gihapon nako siya, ug girlfriend gihapon ko niya.

Hapit na magsugod ng Misa sa among pag-abot ni Digna. Wa na mi makalingkod kay nagsugwak sa kadaghan sa mga tawo ang mitambong sa maong Misa nga gipahinungod sa Mahal nga Birhen Maria. Kini gung Misa de Gallo sumala sa pagpasabot sa pari gipahinungod kini sa Inahan ni Jesus. Unya samtang nagsugod na ang Misa, wa ko lang tuyoa nga nakatan-aw ko sa usa ka lalaki didto sa unahan nga naglakaw. Kalit lang sab siyang nawala sa akong panan-aw tungod sa kadaghan sa mga tawo sa sulod ug sa gawas sa simbahan.

Kalit lang kong gikulbaan. “Naunsa ka diha, Clar? Wa man gud ka mahimutang? Kinsa ba ang imong gilantaw?” “Ah, wa man, Digna.”

Wa ko makasabot sa akong gibati niadtong tungora. Apan imposible. Tua sa London si Jino. Apan morag si Jino gyud tong akong nakita. Duna siyay kaubang babaye. Ang gitas-on, ang porma sa lawas ug ang linaktan si Jino gyud. Gusto kong susihon ang lugar nga gpadulngan sa lalak ug sa babaye. Apan nagpugong lang ko sa akong kaugalingon. Gilingaw ko lang ang akong hunahuna nga di si Jino ang akong nakita.

Dihang nahuman na ang Misa, namiya na mi si Digna sa simbahan.

“Good morning!” Nakatan-aw ko sa lalaki nga miduol namo ni Digna. Si Rommel diay nga mapahiyumon kaayo.

(SUMPAYAN)