MAGNOLIA MOLANGKAT SA KORONA
Duwa karon 7:00 pm- Magnolia batok Alaska
Langkaton na’g suway sa Magnolia Ang Pambansang Manok Hotshots ang korona sa ilang pagpakigbatok og balik sa Alaska Aces karong gabii sa Game 6 sa Philippine Basketball Association (PBA) Governor’s Cup finals series sa Ynares Center sa Antipolo City.
Ang Hotshots nakaposte og 3-2 nga bintaha sa best-of-seven series pinaagi sa makutas nga 79-78 nga kadaugan sa Game 5 niadtong Biyernes nga nahimong posible pinaagi sa puntos ni Paul Lee sa himatyong segundos.
Alang sa Hotshots, dili nila usikan kining maong oportunidad ug gusto nilang humanon na ang series ning higayuna aron matambalan na ang ilang upat ka mga tuig nga kahidlaw sa korona.
Alang sa Hotshots, mao kini ang labing maanindot nga gasa nga ilang madawat sa Kapaskuhan.
“Ito ang pinaka-magandang regalong pwede namin ibigay sa sarili namin. The opportunity is there, so susubukin namin kunin,” matod ni Magnolia coach Chito Victolero sa interbyu sa PBA.PH.
Kon molampos ang Hotshots, nga sakop sa Purefoods franchise, hayan makatabla sila sa Alaska sa ikaduhang luna sa padaghanay og naangkon nga kampiyunato sunod sa San Miguel Beermen.
Sa kasamtangan, ang Hotshots adunay 12 ka mga kampiyunato sa ilang panudlanan samtang ang Aces naghupot og 13 ka mga titulo.
“Pero hindi madali ang haharapin namin. Alaska is really a tough opponent, and as almost everybody says closeout game is the toughest game to play,” pasabot ni Victolero.
“So our approach is the same from the beginning of the series. We’ll treat the game as a knockout game.”
Ang Aces determinadong mopakgang sa tinguha sa Hotshots ug taas ang moral niini bisan naggukod kini sa series. “Game Seven? We’ll certainly try to do it,” matod ni Alaska coach Alex Compton.
Ang upat ka mga adlaw nga pahuway seguradong nakahatag sa duha ka mga kampo nga makapangandam og insakto alang ning grabe ka importanteng kombati hilabi na sa habig sa Aces. “We treat every game like a do-or-die situation,” matod pa ni Alaska import Mike Harris. Sa laing bahin, napahamtangan sa PBA og P20,000 nga multa ang usa sa mga sinaligan sa Aces nga si Chris Banchero gumikan sa iyang pagdapat sa nawong ni Ian Sangalang sa hinapos nga bahin sa Game 5. Igo lang natawagan og regular foul si Banchero niadtong higayuna apan ang iyang gibuhat wala nakaikyas sa camera hinungdan nga gipamulta siya sa liga.