MGA PUJ SAKYAN OG PULIS
MCPO MIMANDO SA TANANG POLICE STATIONS; TUMONG SEGURIDAD
“Ayaw padala sa tentasyon, salig sa Ginuo. Salig nga puhon ugma sa inyong paggawas ang kabag-ohan, kalipay ug kalinaw inyong matagamtaman.”
Mao ni ang mensahe ni Cebu Archbishop Jose Palma sa iyang gipahigayon nga misa sa Cebu City Jail male dormitory kagahapon, Disyembre 21.
Ang wali ni Palma nagsaysay og duha ka mensahe mahitungod sa kamaayo ug kalipay bahin sa presensya sa Ginuo.
Iyang giawhag ang mga piniriso nga pamalandungan ang mensahe alang sa kausaban sa ilang kinabuhi, labina sa ilang paggawas gikan sa bilanggoan.
Ang maong misa aduna sab kalabutan sa programa nga SuGod (Surrender to God) program nga alang sa mga inmate nga adunay drug-related cases.
Ang SuGod usa ka programa para matabangan ang mga piniriso nga adunay kalambigitan sa drugas.
“Atong program diri sa Cebu City jail para sa mga napriso tungod sa drugs unya amo silang tabangan. Tagaan namo sila og recovery plan or rehab treatmet. It’s kind of drug awareness aron sila kahibaw unsaon pag-undang, unsaon para di sila mo bali. Unya both scientific and spiritual. So aduna sa tay gihimo na mga life in the spirit seminars and follow up programs,” matod ni Fe Barino, executive director sa SuGod program.
“Kahibalo ta nga karon grabe na kaayo ang war on drugs. Kusog kaayong balita nga daghang gipatay, daghan sad ang napriso, apan kami sa surrender to God naningkamot sa pagtabang sa mga nalambigit sa drugas kay kami nagtuo nga aduna gyud paglaom ang taw nga niagi pagka drug addict,” dugang ni Barino.
Ang SuGod dunay mga programa sa ubang mga dapit sa Sugbo ug duna nay mga nakatapos niini.
Gatusan na ka mga drug user ang ilang napailawom sa ilang programa.
Kini gipaluyohan sa Archdiocese of Cebu.
Human sa misa, personal nga mi apod-apod si Archbishop Palma og libreng snacks ngadto sa 5,000 ka inmates sa Cebu City Jail male dormitory.