MAAYONG PANAHON SA PASKO: PAGASA

Gidaghanon sa uwan nga natala niadtong Huwebes, Disyembre 20, sud lang sa 15 ka oras tumbas na sa sobra sa katunga sa average nga normal nga rainfall measurement sud sa Disyembre, nga adunay 154.4 mm.

Nakatala ang Philippine Atmospheric Geophysical Astronomical Services Administration (PAGASA) Mactan og 85 mm kun 425,000 ka baril sa uwan matag kilometro kwadrado, hinungdan nga grabe nga baha sa pipila ka bahin sa dakbayan sa Mandaue ug syudad sa Sugbo.

Gani, matod ni Engr. Alfredo Quiblat Jr., officer-incharge sa Pagasa Visayas, nga ang mas daghang natala diin niabot og 60 mm sud sa duha ug tunga sa oras, nahitabo alas 11 sa buntag hangtud sa ala 1:30 sa hapon.

Maayo nalang nga sa pagkagabii nahilis ra ang low pressure area (LPA) nga maoy nagdala sa daghang ulan ug nihinay ang epekto sa tail end of the cold front.

Hinungdan nga sukad Huwebes sa gabii hangtud kagahapon, maayo nga panahon na ang nasinati.

Apan alas 3 kaadlawon sa Biyernes, laing LPA nakakasud sa nasud nga maoy gipanlantawan nga magdala na usab og madag-umon ug katag nga pag-ulan, karon ilabi na sa Eastern Visayas.

Hinuon kay nihinay man ang epekto sa tail end of the cold front, di ra masinati ang susama niadtong’ gikusgon sa ulan, ug arang-arang nga panahon ang masinati sa bisperas ug atol sa Pasko.

“Ang LPA nga nagdala og daghang ulan (Dec. 20), nawagtang siya, nahilis. Pero naay nipuli nga bag-o nga Low pressure Area, kaganiha alas 3 am (Dec 21), nisud siya sa PAR, sa Hinatuan dapit, Surigao Del Sur. Sa gihapon mabaw ang kahigayunan nga mahimo siya nga bagyo,pero ang trough niya makaapekto sa Visayas and Mindanao, particularly sa gabii, sa Eastern Visayas,” pasabot ni Quiblat sa Superbalita Cebu.

Samtang masinati karon ang pinakataas nga gabii ug pinakamubo nga adlaw tungod sa Winter Solstice, kon mosilang ang adlaw karong adlawa sa alas 5:57 sa buntag ug mosalop sa 5:28 sa hapon.

Usa sa importante nga epekto niini, matud ni Quiblat nga sa Enero hangtud sa Mayo sunod tuig, mas menus ang makasud nga bagyo sa nasud.

“Diin ang northern hemisphere, ang hirig sa Earth, pabor palayo sa sun, diin ang northern hemisphere nga naa diha ang Pilipinas, maka-receive og less amount of radiation. Significant ani, nga gamay ang chance nga dunay bagyo, ang number of frequency sa bagyo gamay ra, compare to June to September,” pagpasabot ni Quiblat. /