3 ka mga lungsod gibaha; 1,700 kapin gipabakwit

Mokabat sa 1,750 ka mga tawo ang gipabakwit sa lungsod sa Tuburan atol sa way hunong nga pag-uwan nga hinungdan sa pagbaha ug landslide sa ubang parte sa Sugbo niadtong Huwebes, Disyembre 20.

Gikan sa Barangays VI, VIII ( Sitio Languyon), ug Sitio Manga sa Tuburan, moabot sa 350 ka mga pamilya ang ningbakwit sugod sa alas 5 sa hapon sa Huwebes hangtod sa alas 11 sa gabii sa samang adlaw sa Cebu Technological University (CTU) ug sa Manga Elementary School.

Nagkanayon si Baltazar Tribunalo, pangu sa Provincial Disaster Risk Reduction and Management ( PDRRMO ), human sa pagpangpanghatag og relief goods sa mga evacuees, gipapauli ra sila sa ilang panimalay.

“Karon, nihinay-hinay na, tanan ningbalik na after sa distribution of relief goods, mga lunch time, gipauli na sila,” matod pa ni Tribunalo.

Ang Provincial Social Welfare and Development Office ( PSWDO ) ninghatag og mga bugas, tubig, canned goods ug noodles para sa mga bakwit.

Ang pag-uwan-wan naka cause og pagbaha sa lungsod sa Asturias ug sa Barangay Aliwanay sa Balamban, apan way gipabakwit kay di di dilikado ang lugar. Samtang, ang landslide nahitabo kagahapon sa buntag sa Brgy. Sunog, Balamban.

Ang pagkahugno sa yuta hinungdan nga di maagian ang dalan padong sa Mount Manunggal sa Brgy. Magsaysay.

“Wala g’yod mi kahibawo unsa orasa nag landslide. Nalabyan ra ni ganina ni sir Baltz (Tribunalo) nga nag clearing operation sila, ang DP Engineering brigade sa minor nga landslide ganihang buntag,” butyag ni PDRRMO spokesperson Julius Regner.

Way balita nga dunay mga residenting naangol sa landslide.