Barangay officials, kabanay diha na masayod human mapatay
Mga barangay opisyal ug pamilya wa masayod nga dunay police operation batok sa duha ka gikatahapang mga durugista sa Barangay Jaclupan, Dakbayan sa Talisay niadtong Disyembre 18.
Diha na sila mangasayod human sila gipahibawo sa mga pulis sa Provincial Intelligence Branch (PIB) sa Cebu Provincial Police Office.
Nangamatay sa mao nga operasyon niadtong Martes, Disyembre 18, ang magsuong Rodrigo ug Noel Alvarez, kinsa giingong ningsukol.
Sa buy-bust sa kapulisan, bisan si Angelito Habirina, 57, kabanay wa masayod sa operasyon bisan kon kini nagpuyo mga 50 metros lang gikan sa balay sa mga Alvarez.
Iyang gikompirmar ang magsuon nga mga durugista, kinsa namalhin sa dapit mga unom ngadto sa pito ka buwan na ang nakalabay kay init na ang kapulisan sa Barangay Duljo, dakbayan sa Sugbo.
Motipon unta kini nila sa pagpuyo, apan wa siya mosugot. Samtang si konsehal Joel Arbiso niingon nga wa sila masayod sa kalihukan sa magsuon.
Wa sab sila gipahibawo sa operasyon sa PIB.
“Na shock lang ko sa nahitabo na aduna diay high target diha na area kay wala mi kabalo na diha sila namuyo,” sulti ni Orbiso sa Superbalita Cebu.
Aduna nay pagduda siya nga adunay namuyong bag o sa maong lugar kay aduna siyay nabantayang sakyanan nga magsige og agi.
Sa di pa molabay ang usa ka oras, moagi na sab og balik.
“Nahibong lang ko kinsa tong sakyanan ug daghan sad og mga vandal niini mao tong akong giingnan akong mga sakop sa pag-trace kon asa na gikan nang sakyanan,” dugang niya.