Hunongon ang pag-bully

Atong gisuhid kining nag-viral karon sa social media kalabot niining nahitabong bullying sa usa ka tinun-an sa inila ug dakong unibersidad didto sa Kaulohan. Sa video makita nga kining maong bata nga usa ka taekwondo practitioner nagsigi’g pang-bully ug paghimog mga bayolenting binuhatan o pagpanapat ngadto sa ubang mga estudiyante nga ginamit ang iyang kamao sa pangarate.

Mikatap ang mga video sukad pa niadtong Huwebes sa buntag nga nakakuha og mga negatibong reaksiyon gikan sa mga netizens.

Sa usa ka eksina, makita ang nagkadugo nga nawong sa usa ka bata nga gikulata sulod sa pansayan sa eskuwelahan.

Bisan pa og naigo na siya sa patid ug sukmag wa kini mobawos. Dihay iyang gipaluhod ug gipahawok sa iyang sapatos nga gidunganan usab sa pagbiay-biay.

Bata pa man tuod, pero kon imong makita ang video footage dili kalikayan nga mobukal sa kalagot ang imong dugo nga magtan-aw sa maong abusadong bata nga miabuso sa iyang mga gipangdaogdaog kinsa way sarang ikasukol batok kaniya.

Apan ang paghimaraot kaniya pinaagi usab sa social media dili maoy tukmang solusyon aron siya maleksiyon.

Hataas ug dako pa ang haw-ang nga makapalandong siya sa dakong kasaypanan nga iyang nabuhat.

Ang mga kadagkuan sa unibersidad mihimo gilayon karon og aksiyon kalabot niini ug gikatakdang mopahigayon og subsob nga imbestigasyon. Ilang gipasalig nga di sila magpanuko sa paghatag og silot sa bata kon kini mapatud-an nga sad-an human sa pakisusi.

Gawas sa Philippine Taekwondo Association (PTA), daghan na usab karon ang mga ahensiya sa gobiyerno ang mohimo og dugang pang pakisusi sa maong hitabo.

Niini, atong awhagon ang mga netizens nga isangon na lang ngadto kanila ang tanan kalabot niini.

Hunongon na lang ang pag-bully sa mi-bully.