Pasidaan nga angay tamdan

Daghan sa atong mga kapamilya ang di makasaulog sa ilang pasko sa ilang panimalay. Mao ni sila ang mga pasyente nga nagpaalim pa sa ilang balatian sud sa mga tambalan. Nahitabo ni sa akong misis sa niaging Pasko. Di sayon ug labaw nga di makahuloganon ang Pasko nga anha ra ka sud sa ospital. Ako ni gihisgutan agi og pagpaambit sa akong simpatiya di lang sa mga higala nga na-admit karong bag-o apil na sa ubang mga pasyente nga di pa makagawas hangtod na sa pasko. Ang uban hinuon gihatagan na og clearance sa ilang mga doktor nga makagawas sa wa pay pasko. Busa kadtong dunay mga kapamilya o higala nga na-ospital unta di ninyo kalimtan sa pagbisita. Among mga pangaliya ang dali nga kaayohan sa mga balatian nga inyong giantos.

○○○

Ang Departamento sa Panglawas sa makausa pa subling nagpasidaan batok sa subra nga kaon ug inom nga mahimong maka apekto sa panglawas. Nagbaha ang inom ug kaon ning panahon sa Pasko. Wa ug tuo ang Christmas Party subay sa atong tradisyon. Ang giingon sa DOH ang pagkaon nga makapasamot niadtong may taas og dugo angayan nga likayan. May mga pagkaon sab nga makapasaka og maayo sa sugar alang niadtong may sakit nga dayabetis. Ang high blood og dayabetis magkuyog na gani bantayanan kaayo matod sa mga eksperto. Sus, ang panit sa litson ug softdrink nga maoy sagad idalit lisod balibaran matod pa sa uban. Mao nga nahimong komedya ang gisulti sa uban nga ang ilang litson gikuhaan na daan sa cholesterol mao nga luwas kan-on. Pero sa tinud-anay lang, asa ning gidili sa doktor maoy laming kan-on di ba? Ang lain sab nga pasidaan mao kining pag-andam sa pagkaon. Angay nga bantayan kanang inyong gipalit nga karne o isda. Basin ug dubok na unya pugson gihapon sa pagluto. Ang subra o bahaw nga pagkaon kinahanglan nga klarohon una sa di pa lutoon og usab. Nahinumdum ko sa akong coverage kaniadto sa usa ka pamilyahan nga nagkalibanga human maka kaon sa naugmaan nga espagheti. Ang ilang giingon nga dala kadto gikan sila nga nangumbera. Ang problema kay wa man masud sa refrigerator. Mao nga kong magpabawon mo og pagkaon sa inyong bisita siguroa nga di kini makahatag og problema. Di a pay laing bantayanan. Basin may mga bisita kamo nga nagmotorsiklo unya gidalitan ninyo og mainom. Ayaw kalimot sa paghatag og pasidaan kay wa gyuy maayong laki anang magdrayb og motorsiklo unya nakainom. Mas maayo pang mopauli nga magdyip o magtaxi. Ang gibuhat sa uban kuhaan og yawe o padrayban ug wa makainom. Way pagbasol nga mag-una di ba? Ang blotter sa mga nagdumala sa trapiko naghisgut nga taas kaayo ang porsento sa mga disgrasya nga naglambigit og mga drayber nga nakainom. Apil na gani kadtong nagdrayb ug upat ang ligid. Duna say wa magdrayb nga naligsan kay hubog. Ang pait kong malambigit na sa paregla ug ubang krimen. Mag pasko ta nga way kahasol nga masudlan. Sa kanunay ang pag-amping maoy isud sa alimpatakan.