Mama nga tsismosa
Dear Noy Kulas,
Maayong adlaw kanimo ug sa tanang reader sa Superbalita. Pirme ko mag-atang sa imong column sa inyong website.
Ang akong problema mao ang akong inahan nga magsige og pangdaut sa akong asawa nga unta wa man siyay sala. Ambot nganong kontrahan niya ang akong misis. Siya ra sab kay ang akong papa okay ra kaayo kon manawag ko niya. Sige siya og tambag og alam-alam nga di na lang panumbalingon ang akong mama, pero makalain man gud ang iyang ipanulti nga nangabot nako diri sa abroad.
Ang akong asawa ipanabi ni Mama nga dawo, galante kuno sa iyang pamilya ug mga higala ug ang sakit, naa kunoy kabit si Misis.
Di man gud ni tinuod kay ang akong asawa, maoy gaatiman sa among mga anak kay usa ra ang among helper.Siya ang maghatod kuha sa among mga anak sa eskwelahan ug kon wa siya ana, naa ra siya sa balay. Bisan ang akong papa nakahibawo ini. Kanang galante, di pud na tinuod kay kuripot kaayo na akong misis. Maayo mokupot og kwarta mao wa mi magkalisod. Di sab dawo kay manghatag na nila. Ang akong papa mao ray tunolan kay si Mama bati og buot sa akong asawa.
Noy, ngano kaha nga ingon ani man si Mama sa akong asawa? Unsa kahay akong buhaton? Kon mouli ko, ako kaha siyang I-confront? Nasakitan na kaayo si Misis sa iyang gibuhat kay di baya tinuod ang tanan. Please tambagi ko.
FRED
Fred,
Ang mabuhat nimo o ninyo ana, mao nga pasagdan mo ang imong inahan. But ang imong amahan maoy pasultiha sa iyaha ug kon duna kay mga igsuon, ipabadlong pud. Unyag uli nimo, talk to your mother as calm as possible kay sagad ra ba sa mga ingon ana nga tawo, bisan pag imo nang ibala sa kanyon, di na moangkon.
Kon giunsa mog subay sa imong suwat, mao usab na pasubay sa imong inahan unsa ang imong asawa. Mohilom lagi na. Unya, kinsa to ang iyang gipangsultihan, mahimo usab nga imong ipaabot kanila nga di na tinuod pinaagi sa pagpanabi, without mentioning sa mga tabi sa imong mama. Kana bang you counter the bad ones with the good ones. Kana lang ang labing epektibo mong mahimo nga way gubot nga mahitabo.
NOY KULAS
Alang sa imong problema, e-mail sa kulassuper@sunstar.com.ph ug rojval69@ yahoo.com