Forgiveness

Gisiko kog hinay si Digna. Nagtindog mi sa gawas sa simbahan, sa may kilid nga pultahan kay wa na mi makalingkod sa sulod tungod sa kadaghan sa mga nanimbahay. Nagtindog sab ang lalaki nga gituhoan nako nga si Jino di layo kanamo ni Digna, nagtalikod siya namo. Milingi si Digna nako. “Ngano?”

Klaro sa nawong sa akong amiga nga nahibulong siya. Hinay ra ang iyang tingog kay nagsugod na ang pari sa pag Misa. Gitudlo ko ang maong lalaki sa akong simod. Mitan-aw si Digna sa lalaki. Nakita ko sa iyang nawong nga nakalitan sab siya.

“Si Jino?”

“Bitaw, Digna. Mora man gyud si Jino ang iyang pamorma.”

“Pero imposible, Clar, kay tua siya sa London?” “Mao lagi.”

Unya milingi ang lalaki diri namo ni Digna. Na, nanagko gyud ang among mata ni Digna, uy. Unsaon, si Jino man gyud ang maong lalaki. Morag nakalitan sab si Jino pagkakita niya nako. Dugay ming nagkatinan-away si Jino. Mibalik siyag tan-aw sa sulod sa simbahan, kaha naminaw sa wali sa pari.

Wa mi tingug-tingog si Digna. Wa ko makasabot sa akong gibati niadtong tungora. Gusto kong duulon si Jino aron magkaestorya mi, ug aron makahibawo ko kon nganong nia siya karon sa Cebu, aron makahibawo ko kon nganong di na nako siya makontak sa selpon, aron makahibawo ko kon nganong gituyo niya ang pag-ilis og simpak aron di na nako siya makontak.

Apan wa ko moduol niya. Nagtahod ko sa gitambongan kong Misa de Gallo.

Pagkahuman sa Misa, wa dayon ko mobiya sa akong nahimutangan. Wa sab mobiya si Jino sa iyang gitindogan. Gikulbaan ko. Unsa kahay sunod nga mahitabo ani? Hilom kong nakaingon sa akong kaugalingon.

Unya mitan-aw si Jino nako. “Mouna lang kog pauli nimo, Clar.”

Gitando ko si Digna. Wa gani ko motan-aw niya kay si Jino ra ang akong gitan-aw. Dihang nakalakaw na si Digna, miduol si Jino nako. Misamot kakusog ang gibati kong kakulba. Diha na sa akong tapad si Jno apan wa gihapon ko makatingog. Nagsige lang kog tan-aw niya. Gusto ko siyang gakson tungod sa gibati kong kamingaw niya. Apan nagduha-duha ko sa paghimo ani kay nagtuo ko nga wa na gyud siyay nako.

(SUMPAYAN)