Hontiveros, Max4 mosalmot sa Chooks-to-Go 3x3 basketball

Mosagubang na sab og bag-ong hagit sa natad sa basketball ang gitawag og Cebuano Hotshot nga si Dondon Hontiveros, ning higayuna isip usa ka coach sa dakong 3x3

-Human sa iyang pagretiro sa Philippine Basketball Association (PBA), si Hontiveros nahimong assistant coach sa University of Cebu (UC) Webmasters diin siya nagagikan.

Apan ning bag-uhay lang, gidawat ni Hontiveros ang tahas isip usa ka headcoach sa team gikan sa Sugbo nga mosalmot sa Chooks-to-Go 3-on-3 Tournament nga ipahigayon sa Manila.

Gipasabot ni Hontiveros nga gitutokan na karon sa mga opisyal sa basketball sa nasod ang 3-on-3 tournament gumikan kay mahilakip na kini sa 2020 Tokyo Olympics.

“There are players nga ilaha na gyud nga gi-career ang 3-on3 basketball kay ma-introduce na man ni sa Olympics,” pasab- ot ni Hontiveros sa press conference kagahapon sa opisina sa Max 4 Birada sa dalan sa Osmeña blvd.

Ang Max 4 Birada maoy nag-sponsor sa team sa Sugbo alang sa Chooks-To-Go 3-on3 Tournament nga mosugod karong Pebrero sa sunod tuig alang sa 1st leg niini.

Gipasabot ni Hontiveros nga nagplano siyang mopahigayon og tryouts alang sa pagporma sa iyang team.

“Actually, I have three players in my mind na pero di pa lang sa nako isulti. I’ll be holding first a tryout,” pasabot ni Hontiveros, usa sa labing kuyaw nga three-pointer sa Philippine basketball.

Ang usa ka team langkuban og unom ka mga magduduwa apan upat ra ang makaduwa sa matag leg sa tournament, nga magdalit og P1 million nga ganti alang sa mahimong grand champion.

Ang torneyo, nga ipahigayon sa nagkadaiyang mga SM Mall sa kaulohan, adunay unom ka legs.