ARANETA V. BAUTISTA SA ROBINSONS GALLERIA
Sa dili pa ang usa ka dakong away, si Omega fighter Christian “The Bomb” Araneta mosagubang una og usa ka tune-up bout batok kang Vincent “The Lizard” Bautista karong gabii sa main event sa #Kumbati sa Mall boxing promotion sa Robinsons Galleria Cebu.
Sa official weigh-in kagahapon sa udto sa Manggahan Restaurant sa Lahug, si Araneta mihaom sa weight-limit
nga 110 pounds.
Ang Omega Pro Sports International (OPSI), nga maoy
promoter, nabutang sa kabalaka gumikan kay wala’y bisan anino ni Bautista nga nitunga hangtod nahuman na lang ang weigh-in.
Nasayran nga naabot sa Sugbo si Bautista mga alas 5:00 na sa hapon ug midiretso na kini sa opsina sa Games and Amusement Board (GAB) aron timbangon.
“Supposed to be mga 9:00 in the morning pa unta na siya maabot pero nabiyaan man siya sa iyang flight sa Manila maong gi-book na sab
og laing flight,” pasabot ni OPSI vice president Jerome Calatrava.
Sa sayo pa, si Calatrava mitataw nga kon modaog si Araneta ning awaya, hayan posible na kining makaaway og world title fight karong Marso sa sunod tuig.
“I knew that he’s already ranked in most of the sanctioning bodies. We have an offer for him but we cannot tell you details yet on what those are. We are still finalizing everything but we are looking for a world championship for him next year. As for Omega, we are targeting March and it will be in a bigger venue,” matod ni Calatrava sa press conference human sa weigh-in.
Wala gitago ni Araneta ang
iyang kahinam kabahin sa dakong oportunidad nga naghuwat sa iyang agianan.
“Excited gyud ko nga moduwa og world championship kay sakto ko sa training. Mag-training pa gyud ko og insakto para makab-ot ang akong pangandoy nga maworld champion,” matod ni Araneta, kinsa adunay impresibong 16-0-14KOs nga rekord.
Sa laing mga away, magsangka sila si Ponciano “Ponce” Remandiman sa Omega batok Vicente “Enting” Casido sa Dumaguete, Harmonito Dela Torre batok Richard “Tibay” Betos, Bryan James Wild batok Wilbert Rota, ug Carlo Bacaro batok Mel Anthony Ando.
Ang promosyon sugdan sa alas 4:00 sa hapon.