HEAT NAKAIPSOT BATOK ROCKETS

Wade migiya sa kadaugan; Paul naangol

Gipahimuslan sa host Miami Heat ang pagkaangol sa usa sa labing mga pambato sa Houston Rockets nga si Chris Paul aron iposte ang makutas nga kadaugan, 101-99, kagahapon sa National Basketball Associa- tion (NBA).

Naangol ang wala nga wala nga tiil ni Paul sa 2nd quarter ug wala na kini nakabalik og duwa apan bisan pa niini, nakakombati gihapon og maayo ang Rockets hangtod sa kinatumyan.

Napasulod ni Dwyane Wade ang iyang duha ka freethrows aron hatagan ang Heat og 10196 nga labaw sa nahabiling 1:20 minutos.

Nabuhian og paglaom ang Rockets dihang nakapaulbo og three-point bomb si Eric Gordon nga nakapahak sa labaw sa Heat, 101-99, sa nahabiling 37 segundos.

Sa return play, pakyas ang Heat pagdugang og puntos ug nahibalik sa Rockets ang posisyon sa bola sa nahabiling tulo ka mga segundos ug nakatawag og timeout ang bisitang puwersa.

Ning puntoha, usa ra ka plano ang naa sa alimpatakan sa Heat – dili hatagan og kahigayunan ang kasamtangang MVP nga si James Harden nga makapadaog sa Rockets o kaha makapugos og overtime.

Gikan sa inbound, nadawat ni Harden ang bola apan grabe kapilit ang depensa ni Wade hinungdan nga naahat si Harden pagpasa sa bola ngadto kang Gordon, kinsa nasipyat sa iyang dinaliang itsa sa three-point land sa nahabiling 0.6 segundos.

“If somebody else hit it, we would deal with it. But it wasn’t going to be James Harden,” matod ni Wade.

Ang Heat, nga mingrehistro sa labing una nilang tulo ka sunodsunod nga kadaugan, mingsaka sa 14-16 nga rekord samtang ang Rockets ningdakin-as sa 16-15 nga baraha.

Ang Heat gipangulohan ni Jason Richardson pinaagi sa iyang 22 puntos samtang niidugang og 19 puntos si Ty Johnson.

Aduna pa’y laing tulo ka mga magduduwa ang Heat nga ningmugna og dobleng numero nga puntos lakip na si Wade.

Si Harden maoy nangulo sa Rockets pinaagi sa iyang 35 puntos samtang nitampo og 20 puntos si Gordon.

“We lose a guy of the magnitude of Chris, now we’re fighting again,” matod ni Rockets coach Mike D’Antoni.

“And the flaws that we have are going to come out again and we’ve got to overcome those.”

Si Paul ipaubos sa MRI karong adlawa aron pagsuta kon unsa ka seryuso ang angol nga natagamtaman niini.

Mibiya sa duwa si Paul nga igo ra’ng nakahimo og upat ka mga puntos.

Sa laing duwa, gipangbuntog sa host Los Angeles Clippers ang Dallas Mavericks, 125-121.

/AP ■ IN YOUR FACE: Ang sentro sa Miami Heat nga si Hassan Whiteside (21) nga mihansak atubangan ni PJ Tucker sa Houston Rockets niining aktoha atol sa second half sa ilang duwa kagahapon sa NBA.