MAMA ‘GIDAPATAN’ SAB SA PARI
NITUG-AN SA MGA IMBESTIGADOR; FR. OLMILLA GIKIHA, MIPYANSA
Di lang diay ang dalagita ang gidapatan sa pari, apil usab diay ang iyang inahan nga kusinera.
Duklon siya ug ilabay ang iyang luto kon di makauyon sa pagkaon ang pari.
Nasayran kini sa mga pulis ug mga social worker nga nag-imbestigar sa inahan ug sa dalagita.
Tungod niini, giawhag siya ni Jessie Perez, pangu sa City Social Welfare Office sa dakbayan sa Mandaue, nga mopailawom usab sa counseling tungod sa nasinati sa giingong pangabuso ni Fr. Decoro Olmilla.
“Siya man mismo niingon nga bisan gani daw siya naka-experience nga duklon, kon di ganahan si Father, dili maayo sa iyang giluto. Isalibay ang pagkaon ug duklon siya.. But gibalewala ra daw niya. Ato gipasabot siya nga lahi ang iyang tolerance of pain ug ang sa bata. Ang atong concern gyud karon ang welfare sa bata,” matod ni Perez.
GIKIHA
Kasong child abuse o kalapasan sa Republic Act (R.A.) 7610 kun Special Protection of Children Against Abuse, Exploitation and Discrimination Act ang gisang-at nga kaso batok kang Olmilla nga giakusahang nanapat sa 15 anyos nga dalagita pasado alas 2 sa hapon sa Biyernes, Disyembre 28, sa piskalya sa Mandaue City.
Ang inahan sa dalagita niduso og affidavit of desistance sa piskalya aron di na unta ihinayon ang pagpasaka sa kaso.
Apan matod ni Perez nga ang social worker ug kapulisan sa Women and Children Protection sa Canduman police station ang nikuyog sa batan-on ug niduso sa kaso.
Kini human usab, matod ni Perez, nga mismo ang dalagita naghilak nga nihangyo nga mokiha sa pari. Nitabang sa pagduso sa kaso ang Children’s Legal Bureau (CLB).
Pasado alas 3 sa hapon usab, matod ni PO1 Jinelyn Formentera, pangu sa WCPD sa Canduman Police station, nga hingpit nga nakaangkon sa iyang temporaryo nga kagawasan si Olmilla human nakapyansa og P80,000 pinaagi sa cash bond.
Kagahapon sa buntag sa Biyernes gibalik ngadto sa tambalanan ang dalagita alang sa medical ug psychological examination human nga niadtong Huwebes wa gilahos sa inahan ang examination, kay tinguha na nila ang mopauli sa dakbayan sa Toledo.
Apan ang CSWS ang nipugong ug nikustudiya sa biktima, human nasuta nga special child kini.
“Ato pa gipaabot ang result sa medical ug psychological exam sa bata aron mahibaw-an gyud unsa ang iyang depekto, kay sa inisyal, slow learner ning bataa ug naa daw ni gamay deperensya. So, naa gyud ni siya special needs, the more nga kinahanglan sabton ug mas maayo nga pag-atiman,” gipasabot ni Perez.
ABOGADO
Kon gikinahanglan ang serbisyo sa usa ka abogado, hatagan sa artsidyosesis sa Sugbo si Padre Decoroso Olmilla niini aron dunay manalipod ingon man ang kampo sa menor de edad nga giingong maoy gibunalan og karton sa pari.
Si Cebu Archbishop Jose Palma nikompirmar nga girelibohan na sa pagka kura paroko si Olmilla sa Nativity of Mary Parish sa Brgy. Canduman, sugod sa Huwebes, Disyembre 27 Mandaue ug temporaryong modumala si Msgr. Danilo Sanico, usa sa mga vicar general sa Archdiocese of Cebu.