‘USMAN’ MIRUMBO SA NORTE

Naluwas ang pari ug iyang tulo ka mga sakristan nga sakay sa motorbanca nga nakasinati og engine trouble sa kadagatan sa Brgy. Tacup, lungsod sa San Remigio sa Biyernes sayo sa buntag, Disyembre 28.

Ang naluwas giila sa Public Information Office sa lungsod sa San Remigio nga si Fr. Nazario Caiban, 37, samtang ang iyang mga kauban nga naluwas mao silang Jeosy Lopez, Alnier Lopez ug Walter Lopez.

Nibiya ang gisakyan nila nga motorbanca sa brgy. Tacup mga alas 6 kagahapon sa buntag ug hingpit silang nakit-an sa nugyanan sa Philippine Coast Guard Hagnaya Sub-station mga alas 10:40 sa buntag.

Si Caiban maoy pari sa brgy. Doong, Bantayan ug matod pa mopahigayon unta siya og misa alas 10 kagahapon sa buntag sa maong dapit hinungdan nga nipugos siya og lawig gikan sa San Remigio bisan og dunay giisa nga storm signal number 1 sa northern Cebu.

Wa pa makalayo sa brgy. Tacup ang gisakyan nga motorbanca dihang nakasinati kini og kakulian sa makina hinungdan nga nagpakitabang sila sa mga tinugyanan sa Coast Guard.

Matod sa tigpamaba sa Provincial Disaster Risk Reduction and Management Office nga si Julius Regner, nalangay ang pagluwas kanila tungod sa zero visibility ug kusog nga bawod. Ang labaw sa Municipal Disaster Risk Reduction and Management Office (MDRRMO) sa San Remigio, Manuel Conde niingon nga daghan ang mga motorbanca operator nga tago-tago nga pakyawon sa mga lokal ug langyawng turista aron molabang sa isla sa Bantayan ug usa kini sa ilang mga problema kon dunay bagyo, sama karon.

Matod ni Conde, wala magkuwang ang MDRRMO ug ang Coast Guard sa pagpahimangno gyud unta sa mga nanag-iya ug mga sakyanan sa kadagatan labot sa dili paglawig kung dunay bagyo apan magmagahi gihapon ang uban.

“Mao bitaw makalagot unya motawag biya dayon para magpa-rescue kon ma-aberya,” niingon si Conde.

MULTA

Di mominos P71,500 ang bayran nga multa sa operator sa motorbanca nga gisakyan ni Padre Nazario Caiban nga naaksidente sa kadagatan sa Barangay Tacup, lungsod sa San Remigio sa Biyernes, Disyembre 28.

Si Coast Guard Station Cebu Commander Alvin Dagalea, nibutyag nga giisyuhan na nila og Enforcement Inspection Apprehension Report ang operator sa motorbanca gumikan sa tulo ka mga kalapasan nga nahimo human nipugos og biyahe bisan kon dunay bagyo.

Matod ni Dagalea, pamultahon og P60,000 ang operator gumikan kay nibiya kini sa pantalan sa San Remigio bisan kon way pagtugot gikan sa Philippine Coast Guard; ikaduha, nikarga og unauthorized nga mga pasahero sakay sa motorbanca nga may multa nga P500 matag pasahero ug laing P10,000 nga multa gumikan sa pag-operate og motorbanca bisan kon dunay bagyo.

Si Dagalea nipasidaan sa mga operator ug tag-iya og mga barko, motorbanca ug ubang sakyanan sa kadagatan nga dakpon sa iyang mga sakop kon magmagahi ug mopugos sa pagbiyahe taliwa sa dautang panahon.

“Kinahanglan himuon ta ni para dili na sila makalarga. Kay bisan og unsaon nato og badlong ug information dissemination, gahi og mga ulo bisan naay signal (sa bagyo), despite naay babala,” padayag ni Dagalea dihang nahinabi sa Superbalita Cebu. /