Dul-an P1M nga pabuto gibasa sa CCPO, LCPO

Dul-an sa P1 million nga balor sa mga illegal nga pabuto nga nasakmit sa inspeksyon sa Cebu City Police Office CCPO gipangbuboan og tubig aron di na magamit.

Gipakita sa kadagkoan sa CCPO nga gipangulohan ni Sr. Supt. Royina Garma ug gisaksihan sa hepe sa Firearms Explosives Division 7 nga si Sr. Supt. Erickson Dilag ang illegal nga mga pabuto nga nasakmit sa inspeksyon sa Mambaling police station sa wa pa ang Pasko.

Nakuha ang maong mga pabuto sa designated area sa South Road Properties (SRP), apan nakabantay ang kapulisan nga adunay giapil sa pag display nga illegal nga wa malatid sa lagda sa Philippine National Police (PNP).

Matod ni Garma nga ang maong mga pabuto imported nga hugtanong gidili sa balaod sanglit ang gihatagan lang og permiso sa gobyerno kadto lamang ginama sa Pilipinas.

Ang mga pabuto nga gipangsakmit sa kapulisan naglakip sa 95 ka Diamond Fantasy Wand; 32 ka10 shot Pegasus; pito ka 49 shot Pegasus; walo ka 36 shots Fun Shape; 10 ka 36 shot Straight Up; upat ka 16 shot Premium; 37 ka 16 shot Regular; 48 ka small Fountain; 20 ka Pear Everywhere; 12 ka 1,000 rounds sa Bawang; usa ka 500 rounds sa Bawang; ug duha ka 50 rounds sa Bawang.

Dugang ni Sr. Supt. Dilag nga mahimong mahatagan silag permit sa ilang pagpamaligya apan kon makita sa mga inspector nga gidili kini tungod kay sobra ra sa timbang, mahimo gihapon kining imbargohon.

“Kaya ng mga yun prohibited yun eh.To sell this one, you have the permit, ” matod ni Dilag.

LAPU-LAPU

Gipangulohan ni Senior Superintendent Limuel Obon, director sa Lapu-Lapu City Police Office, ang pagbasa sa mga ilegal nga pabutong nasakmit sa kapulisan gikan pa niadtong Disyembre 23 hangtod na sa Pasko sa Lapu-Lapu City Police Office grounds kagahapong adlawa, Biyernes, Disyembre 28.

Ang mga pabuto nga gibasa og tubig pinaagi sa paglunod niini sa mga dagkong drum sa tubig pulos oversized kun nasobraan ka dagko, mga imported samtang ang uban gibaligya sa di designated firecracker zone sa dakbayan.

Nasayran nga mga barangay lang sa Babag, Canjulao ug Kalawisan ang gitugotang makapaninda og pabuto sa dakbayan.

Ang mga pabuto nga gibasa naglakip sa “Dalogdog”, “Judas Belt”, “Butterfly”, “Mercury”, “Sparklers”, “Bingala” ug “Piccolo”.

Sa mga nasakmit bugtong ang “Dalogdog” lang ang oversized kun nasobraan kadako hinungdan nga gisakmit samtang ang uban wa masubay sa lagda sa pagpaninda og pabuto sa dakbayan.