24-anyos nga lalake naghikog; naglingkod sa lingkuranan

Nakaplagang patay sulod sa iyang kwarto ang 24 anyos nga lalake human naghikog tungod sa giingong depression niadtong Disyembre 27 sa Brgy. Dawis, Talisay City.

Patay nang nakit-an sa iyang inahan sa sulod sa iyang kwarto si Vancee Saint Jayno.

Nagduda ang iyang pamilya nga depression ang rason sa paghikog, apan wa na sila mohatag og detalye.

Matod pa ni Cristina Jayno, 57, inahan, nga iyang nakit-an si Vancee sulod sa iyang kwarto nga nagbitay sa pisi pasado alas 5 sa buntag niadtong Huwebes.

Dali nilang giduol ug gitangtangan og pisi sa liog, apan patay na kini.

“Among gi check kon buhi pa ba. Apan wala na kini ginhawa ug paghikap nako sa iyang lawas, bugnaw na man,” dugang ni Cristina.

Si Vancee nagbitay sa pisi nga nakalingkod sa lingkoranan ug nakasulod sa balde ang tiil niini.

Wa sila masayod kon unsa orasa nahitabo tungod kay wa silay nadunggang mga kasikas sa iyang kwarto.

Apan sila nagtuo nga baguhay palang kini tungod presko pa ang dugo anaa sa liog ni Vancee.

Wa magtuo ang inahan sa nahitabo sa iyang anak tungod kay pinangga kini niya.

“Kon unsay gusto sa akong anak, akong ihatag. Ingana nako siya kapinangga, mao nang dili ko makatuo na mabuhat niya ni” subay ni Cristina sa Superbalita Cebu.

Ang usa sa igsuon ni Vancee nga wa nagpa-ila, niingon nga nakugang ug naguol siya.

Ang igsuon nga seminarista niingon nga niuli siya gikan sa seminary para mag Pasko sa ilaha apan wala siya mag-expect na sa iyang pag-uli mao kini iyang maabtan.