Di ila ang kwarta
Pagkapait sa gidangatan sa mga taga Barangay Duljo Fatima nga nangasunogan kay gawas nga nangawad-an pa sila og mga balay, gilisodlisod pa sila sa paghatag sa mga hinabang human sila maigo sa katalagman. Dunay hinabang sa Cebu City Government nga toa giagi sa Barangay Management Office (BMO) nga toa sa Sawang Calero gipanghatag. Gikinahanglan pa sa mga biktima sa sunog sa pagplite kun hagoan ang pag-adto.
Di man gud kaalyado sa Bando Osmeña Pundok Kauswagan (BOPK) si Duljo Fatima Barangay Captain Elmer Abella kay naa siya kang kanhi mayor Mike Rama nahisakop.
Unta, sa mga katalagman sama sa sunog, diin daghan ang nangabiktima, isalindot ning pulitika aron mapadali ang pagpadangat sa hinabang ngadto sa katawhan nga maoy nanginahanglan niini.
Naigo sa sunog ang mga taga Duljo Fatima, apan nganong gikinahanglan pa man gud nila nga moadto sa Sawang Calero sa pagkuha sa ilang mga hinabang? Naa may barangay gym, nganong di man idiretso sa paghatag didto bisan kon naa ang mga barangay official ubos ni Abella?
Mahimo ra man tingaling estoryahon si Abella nga sila ang modirekta og hatag ngadto sa mga biktima. Kay kon mopalag ang kapitan, di kini makadaut sa mga taga BOPK, siya mismo ang masumbalik sa kasuko sa katawhan. Siya mismo maakusahan nga namulitika.
Samtang mag-angat ang 2019 elections sa Mayo, posibleng kini nga hitabo masubli ug masubli pa. Ang katawhan nga biktima sa katalagman mao ang mahimong makaluluoy.
Maora bag ang salapi nga gihinabang ini nga mga biktima kwarta sa mga pulitiko. Di ra ba. Gikan ni sa panudlanan sa kagamhanan nga nakatigom og kwarta gikan sa mga buluhisan, sa yanong mga tawo ngadto sa labing adunahan.
Busa, si bisan kinsa, kinahanglan nga makadawat unsa man ang iyang kolor sa pulitika kay di ni kwarta sa mga pulitiko.