Sulbad sa dautang panahon

Dismayado ang mga bakasyonista nga naatlan sa grabing ulan ug dagkong balod dinala sa bagyong Usman. Ang mga mobiyahe gikan sa Sugbo padung sa mga distinasyon nga apektado sa bagyo di ka larga. Ang mga nahinayak natanggong sa mga pantalan. Kadtong mobiyahe padung sa ato natanggong sab sa mga pantalan diin magsugod ang ilang panaw tungod kay way biyahe. Sa ato pa, libo ka libo ka pasahero karon ang nangatanggong sa daghang pantalan nga apektado sa bagyo. Usa sa akong mga coverage diin nangatanggong ang daghang pasahero di gani bagyo ang ang hinungdan. Gale warning gikan sa Pag-asa nga gipatuman sa taga Coast Guard maoy nakaingon. Ang advisory naghisgut lang og biyahe padung sa Bohol. Ang sulti sa usa sa akong gi-interview pagkaduol ra unta sa Tubigon ug tungod lang sa dagkong balod malangay ang ilang pagpauli. Ang akong gi-interview nihisgut og tulay nga magdugtong sa Sugbo ug Bohol. Matod pa niya kini maoy sulbad sa kahasol nga masugatan tungod sa pag-usab usab sa lakat sa panahon. Mao sab ni ang yawyaw sa natanggong nga mga pasahero sa mga pantalan sa habagatang Sugbo. Gusto nila nga may tulay nga magdugtong sa Sugbo ug Negros. Bisan ang mga taga Bantayan , taga Leyte nihisgut sab kaydi lalim ang kinabuhi nga magpuyo sa pantalan tungod kay naatlan sa bagyo o gale warning. Human sa maong coverage wa damha nga nibaha ang mga sugilanon labot sa mga plano pagdugtong sa mga isla sa Kabisay-an pinaagi sa pagpabarug og tulay. Tuod man nanggawas ang mga plano ug hangtod karon ang katawhan labi na sa mga biyahidor mahinamong nagpaabot. Ang atong masaksihan hinuon karon mao ang gisugdan nga pagtrabaho sa tulay nga magdugtong sa Cebu City ug Cordova. Basin mosunod ang Cordova padung sa lungsod sa Jetape. Hinaot pa unta . Kon maghisgut ta og tulay, gawas sa linog, magpadayon ang biyahe bisan dautan ang panahon. Kadtong dunay sakyanan bisan unsang orasa mahimo silang motabok sama sa mga tulay nga nagdugtong sa isla sa Mactan og mainland Cebu. Tungod sa tulay mas dali nga mangabot sa kamerkadohan ang mga baligyaonon. Tungod sa tulay mahimong mous-us ang presyo. Ug tungod sa tulay molambo ang turismo. Mosaka sab ang presyo sa yuta ipabi na sa mga hilit nga dapit. Kini og uban pa nga benepisyo ang mapaabot. Ang labing importante wa nay tiyan nga magkutoy sa mga pantalan kay natanggong tungod sa bagyo.

Daghan ang nisimpatiya sa mga biktima sa sunog sa unom ka sityo sa Barangay Duljo-Fatima Tres mil kapin kun kulang ka mga tawo karon ang gipahiluna sa evacuation center. Di sayon ang ilang gidangatan human nga ang nagdilaab nga kayo namukaw sa nahinanok nga mga molopyo. Kinsa tong dunay mga paryente o higala sa mga biktima unta magahinan ninyo og panahon sa pagbisita.