Bantay salakay

Dear Noy Kulas,

Maayong adlaw nimo. Tawga lang ko og Benhur, taga southern Cebu ug pirme nagsunod sa imong column sa Superbalita sukad kaniadto nga wa pa si Papa Joe. Naka decide ko nga ako na sab ang mopadala nimo og suwat.

Ang akong problema ambot complicated ba pero nakabasa na ko sa ani nga problema sa imong column. Ang akong problema mao ang akong sister-in-law nga akong nauyab karon.

Ingon ani ang akong estorya, Noy. Kining akong igsuon nga maoy bana ani niya grabe ka playboy adtong ulitawo pa. Nakaanak na ni og kaduha sa lainlain nga babaye. Pero ambot ning iyang asawa nadala gihapon niya og diskarte ug nagminyo sila sa huwes.

Bisan kon minyo na sila, wa mausab ang akong brod, sige lang gihapon og pamabaye hangtod nga wa na makaagwanta ang akong bayaw, iya ning gibuwagan. Nagka close mi sa akong bayaw kay ako ang pirme niyang sumbongan sa iyang mga problema. Hangtod nga na-develop ang among feeling ug nagkauyab mi. Naa na nahitabo namong duha.

Gusto na namo nga I-display ang among relasyon pero nahadlok ko nga masuko ang akong igsuon bisan taudtaud na silang nagbuwag. Worried sab mi nga sa reaction sa among tagsa ka pamilya.

BENHUR Benhur,

Kalisod nianang inyong sitwasyon. Komplikado kaayo. Minyo ang imong igsuon ug imong bayaw. Mao ni ang usa sa dako ninyong problema kay nagkinahanglan kini og annulment kon gikinahanglan ninyong magminyo. Apan ang una ninyong sagubangon mao ang reaksyon sa imong brod ug sa inyong magsig ka pamilya. Wa ta kahibawo kon ikasuko ba kini sa imong igsuon kay matandog ang iyang garbo kay ang iyang asawa imo nga giilog. Naa ra bay mga babaero masuko nga mailugan sa ilang tropeyo kay natandog ang garbo.

Mas maayo nga sugdan nimo og pangutana ang imong brod kon unsa iyang plano tali sa iyang asawa ug niya. Buhian na ba niya ang iyang asawa kay taudtaud na silang nagbuwag. Kon positive ang iyang response, nakadawat na siya nga wa na sila, diha ka na hinayhinay nga mopakita kon unsa ang inyong score. Pananghid usab sa inyong parents aron duna kini blessing.

Kon ang imong pamilya okay, ang next move mao ang annulment nga medyo mahal pa kaayo. Pero mas maayo man gud nga way problema kon moabot ang panahon nga magminyo mong duha.

NOY KULAS