New Year’s love
Bisag managkaluha sila si Nero ug Mayro, first time ko pang gikaatubang sa personal si Nero. Didto na man gud kini sa seminaryo nagtungha bisag haysikol pa siya. Namatikdan nako nga dunay kalainan ang kinaiya sa managkaluha. Si Mayro seryuso nga pagka lalaki. Samtang si Nero madasigon nga pagka tawo. Bisag namatay ang iyang kaluha ug gihaya pa sa ilang balay, apan namatikdan nako sa iyang mga mata ang pagka malipayon nga pagka lalaki.
Makahimo gihapon siya sa pag-smile.
“Ikaw ang kanunay gibida ni Mayro nako, Lenlen, sa buhi pa siya. Kanunay ming magkontakay sa facebook ug sa selpon. Bisag nag-antos na siya sa iyang sakit nga kanser, di gyud siya makalimot sa pag-ingon nako nga forever ang iyang love nimo.”
Mihuot ang akong dughan sa gisulti ni Nero. Nagtapad mig lingkod sa taas nga sopa duol sa lungon ni Mayro. Nakahilak gyud ko.
“Im sorry, Len, nga natandog ko ang imong kaguol pero kinahanglang makahibawo ka kon unsa kadako ang pagmahal ni Mayro nimo.”
“I know, Ner. Namatikdan ko ni sa iyang mga lihok nga gipakita nako, sa iyang mga sinultihan nako. Ug nakahibawo sab si Mayro kon unsa kadako ang love ko niya.”
Miyangu-yango si Nero. Unya mitindog siya dihang dunay bag-ong nahiabot.
“Biyaan una tika, Len. Naay mga paryente namo nga miabot.”
Igo ko lang gitando si Nero. Gisundan ko siyag tan-aw nga mibiya nako. Parehas gyud silag linaktan ug linihokan si Mayro. Ug parehas sab silang guwapo. Apan dunay kalainan sa ilang panglawas. Siyempre daot si Mayro tungod sa iyang sakit, samtang macho si Nero, dagko siyag mga braso, ug bus-ok og dughan. Klaro nga kanunay siyang nag-workout.
Miduol si Joyce nako. Unya mitapad siyag lingkod nako.
“Adto ta sa akong kuwarto, Te Len, aron makapahuway ka.”
“Anhi lang una ko, Joy. Moanhi ron sila si Mama ug Papa, magda’a sa akong mga biste. Giingnan ko sila ganinang buntag sa dayon kong anhi nga unongan ko si Mayro sa iyang haya.”
“Maayo sab nuon. Malipay si Kuya Mayro ana. Adto lang katu’og sa akong kuwarto. Dako man ang akong kama.”
Miginhawa kog lawom ug kahilakon na sab ko. (SUMPAYAN)