Tepora wa mahadlok sa bahad sa Mexicano
Wa mahadlok si undefeated ug interim World Boxing Association (WBA) featherweight champion Jhack “El Kapitan” Tepora sa bahad sa beterano ug Mexicanong challenger ug kanhi world champion nga si Hugo “Cuatito” Ruiz sa ilang away karong Enero 19 didto sa MGM Grand sa Las Vegas, Nevada isip undercard sa Manny PacquiaoAndrien Broner fight.
“Pa-abuton lang na nako iyang gipang-isturya. Ug iyaha kong i-knockout swerte siya, ug dili gani ko niya matumba malas siya. Basta duna gyuy matumba ani ako o siya,” matod ni Tepora pinaagi sa online interview sa Super Balita.
Maayo siya, kusug sad, taas siya kay sa ako-a, pero dili mana sa height daugon. Ug ako-a jud na gipangandaman iyahang bahad.”
Sa usa ka interview, ang 30 anyos nga Ruiz midayeg man tuod sa abilidad ni Tepora apan iyang gipasalig nga iya kining tumbahon ug paundangon.
“I do not think he can counteract my power, I will knock him out, I will do my best to win that title. I’ve seen videos of him and we have been working very hard;. I am really concentrating on how to defeat him because I am still young, but I have the experience to win,” matod ni Ruiz (38-4, 33KOs).
Tinguha ni Ruiz nga makalangkat sa ikatulo world title sa managlahing division. Siya kanhi world champion sa bantamweight ug super bantamweight division.
Gitug-an ni Tepora nga nakakita na usab siya sa estelo ni Ruiz ug iya kining gihulagway nga dili kini perming moataki si Ruiz.
“Dili man kaayo siya fighter, modistansiya man sab siya. Akoy mo-agresibo ani nga away kay gusto sab nako siya nga tumbahon,” matod ni Tepora kinsa adunay limpyo nga 22-0, 17KOs nga baraha.
Sa kasamtangan, si Tepora nagpadayon sa iyang training ubos sa iyang duha ka igsuon nga sila si Pingping ug Jingjing Tepora.
Iyang gibutyag nga ang duha maoy iyang ikuyog didto sa Estados Unidos human siya mibiya sa iyang trainer sa Omega Boxing Gym nga si Julius Erving Junco tungod sa ilang panagbangi.
Posibling mogikan ang Team Tepora sa sayong bahin sa Enero tukma sa paghiabot na usab sa iyang visa.