3 NI BOGDANOVIC MITIPI SA LAKERS

Warriors gipukan sab sa 3-point shot ni Lilliard

Nakapabuto og buzzer-beater three-point bomb si Bogdan Bogdanovic aron pabangunon gikan sa 15 puntos nga pagkalubong ang host Sacramento Kings ug pakuratan ang Los Angeles Lakers, 117-116, kagahapon sa National Basketball Association (NBA).

Hinuon wala’y angayang ikauwaw ang Lakers gumikan kay ning sangkaa, ilahang napamatud-an nga kaya nilang mokombati bisan wala ang ilang lider nga si LeBron James.

Si James, 4-time MVP, wala miduwa ning sangkaa gumikan kay naangol kini sa may bilahan atol sa dakong kadaugan sa Lakers batok sa defending back-to-back champions Golden State Warriors niadtong adlaw sa Pasko (US time).

Mao kini ang labing unang higayon nga wala nakaduwa si James gikan sa iyang pagbiya sa Cleveland Cavaliers aron motapon sa Lakers.

Ang Lakers nagkontrolar hapit sa kinatibuk-ang duwa ug dumadaog na unta sila kon wala pa ang sagol buwenas nga three-point shot ni Bogdanovic.

Gipangulohan ni Bogdanovic ang Kings pinaagi sa iyang 25 puntos, nidugang og 19 puntos si Willie Cauley-Stein, niamot og 18 puntos si Iman Shumpert samtang nihatag og 15 puntos si De’Aaron Fox.

Ang Lakers gipangulohan ni Kyle Kuzma pinaagi sa iyang 34 puntos samtang nitampo og 20 puntos ug 12 assists si Lonzo Ball.

Nialisngaw na unta ang kadaugan alang sa Lakers dihang nakamugna sila og 10489 nga labaw sa nahabiling 6:44 minutos.

Apan sa wala damha, ningbulhot ang opensa sa Kings.

Mao usab kini ang nasinati sa defending champion Golden State Warriors kinsa nasugamak sa 110-109 nga kapildihan sa mga kamot sa Portland TrailBlazers sa overtime nga duwa.

Ang tres ni Damian Lillard sa katapusang 6.3 segundos sa extra period maoy nagselyo sa kadaugan sa Portland. Nahingpit og katiurok ang paglaom sa Golden State human masipyat si Kevin Durant sa iyang 13-footer jumper.

Si Jusuf Nurkic mipuga og 27 puntos ug 12 ka rebounds alang sa Blazers kinsa nakakuha usab og 21 gikan ni Lillard.

Taliwala sa kapildihan, si Durant mitapos sa duwa nga naka-triple double - 26 puntos, 11 ka assists ug 12 ka rebounds.