New Year’s love

Morag di ko makaginhawa sa subrang kalipay nga akong gibati pagkakita sa lalaki nga nahiabot. Nindot kaayo siyag smile nako samtang nagtindog siya sa gawas sa pultahan sa sala. Mikusog ang pagbutuk-butok sa akong dughan.

Nganong gibati ko man ang grabeng kalipay pagkakita ko niya?

“Maayong gabii, Len. Di ba lang diay ko nimo pasudlon?”

“H-Ha?” Mora kong kalit nga nakamata gikan sa pagkatulog. “Su’od diay, Nero.”

Mihiplig ko aron paghatag og lugar kang Nero sa pagagi. Misunod ko kang Nero ug gipalingkod ko siya sa sopa, unya milingkod ko sa iyang atbang. Nakapangawot ko sa akong ulo ug wa ko ipakita niya ang gibati kong kalipay sa iyang pag-anhi nako ron.

“Kining, Ner, kalit man kaayo ning imong pag-anhi.” “O, Len.” Miginhawa ko. Ambot ba sab, uy, nga mora mag wa gyud ko mahimutang aning pag-abot ni Nero sa among balay.

“Kining, Ner, kinsa may imong tuyo sa pag-anhi ron sa amo?”

Na, misamot kakusog ang gibati kong kakulba.

“Ikaw, Len. Sa wa pa ko moanhi ron, nananghid ko nilang Mama, Papa ug Joyce. Puwerte nilang lipaya.”

“H-Ha? Nganong nalipay man sila, Ner?”

Sus, wa na gyud ko makasabot sa akong gibati niadtong tungora. Morag naghinam-hinam ko sa itubag ni Nero nako.

“Nga ikaw ang rason sa kalit kong pagpauli ron, sa kalit kong pagpakanaog og desisyon sa paggawas sa seminaryo.”

Puwerte gyud nakong kuganga sa gisulti ni Nero.

“M-Migawas ka sa seminaryo, Ner? Kay ngano man?”

“Tungod nimo, Len. To be honest, sukad lang tika nakita in person, di ka na mawa’a sa akong hunahuna. Nagpakitambag ko sa among dakong pari sa seminaryo. Gitambagan ko niya nga pagawason lang una ko sa seminaryo samtang gihasol pa ang akong hunahuna sa wa ko masabting pagbati nganha nimo.”

Nabatyagan ko ang pagblush sa akong nawong. Wa ko makatingog. Mao ray akong nahimo ang pagtan-aw pag-ayo kang Nero nga ning higayona seryuso na.

“Wa ko pa maklaro kon unsa gyud ning pagbatia, Len. Gugma ba, o usa lang ka pagdayeg sa imong kaguwapa.”

Na, misamot pagpamuwa ang akong nawong sa katapusang mga pulong nga gisulti ni Nero nako. Namatngonan gyud kaayo nako kini. (SUMPAYAN)