Way utlanan ang paghandom
Daw nagdilaab nga kalayo nga gikan sa usa ka way-kamatayong daob kining akong gibati. Dili ikalimod nga dunay pagbating di makaantos sa kamingaw, dunay pagbating buot nang tapuson ang iyang kapakyasan, may mga luhang gikan sa nagmahayng kasingkasing nga daw usa ka amang, bungol, bakol, paralitiko ug magul-anon. Apan kining akong pagbati nahimong samad nga karon nagkinahanglag hunad aron motang-on ang pagsige’g agos sa iyang kangulngol nga maoy hinungdan sa pagkaluya sa kalag, tim-os nga kalag diin ang hilumong pagbati kinadenahan diha sa damgo ug unya motuasik dayon ang kahiubos ug molantong ang usa ka dagat nga dili na mokuyog sa kusokuso sa lampingasang unos sa subasko.
Ug karon gibalik ko paglantaw ang isla Puting Bunbon. Duol na lang ako sa baybayon sakay sa akong pambot. Tingali naa pa gihapon didto kadtong binuhat nga maoy naghatag kalunhaw ning pagbati nga taudtaod nang gilaya sa kali- mot. Si Amayang nga taga Isla Puting Bunbon, ang babaye nga mihatag og bulok ning nahibalik kong anino, anino nga dili na buot pang mapakyas, sama niadtong higayon nga gibuwagan ako ni Maria Flordelis.
Pagdunggo sa akong pambot gisugat ako ni Amayang. Puti si Amayang ug may katahom nga nahimong larawan ning hilumong isla. Apan kinahanglan pang awiton ko ang usa ka awit sa kasub-anan. Di ba mahal man ako ni Amayang? Gani, may mga handumanan man kami nga dili na gayud malaksi ning akong dughan. Kadtong hapon kanus-a gihatag niya kanako ang iyang kaputli. Mihilak siya nga may pahiyom ang mga ngabil.
“Sama ka sa gapnod nga gidagsa dinhi sa among isla, Uldarico, ug matag taob ning akong pagbati, ingon sa ianod ka gikan kanako aron mobalik ka sa dapit diin dunay nagpaabot kanimo,” ni Amayang nga may pahiyom sa iyang mga ngabil.
“Dili ko mobiya dinhi sa isla, Amayang. Kon gapnod man ako, ikaw mao ang timgas nga puting bunbon dinhi sa isla. Ug dili mahanaw dinhi sa kalibutan ang duha ta ka gugma.” Gihagkan ko ang mga ngabil ni Amayang. Mibalos siya paghalok sa akong mga ngabil, dungan ang hugot nga paggakos kanako. Diay, kadtong tanan pasiuna lang sa umaabot niyang pagkahanaw. Namatay si Amayang kay gilugos ug gipatay sa way puangod nga pirata.
APAN buhi, buhi si Amayang kay way kamatayon ang among gugma. Anaa siya. Iya kong gisugat. Naglakaw siya subay sa puting bunbon. Ug mitimpasaw ang akong mga tiil sa tubig sa dagat kay nagdali akong misugat kaniya dihang nanaog ko sa akong pambot. Apan dihang buot ko siyang gakson kalit siyang nahanaw sa akong panan-aw.
Hain man diay si Amayang karon? Ingon sila dinhi sa isla patay na kuno si Amayang. Apan dili ko motuo kay buhi si Amayang. Buhi siya sama sa mga puting balas dinhi sa baybayon sa isla sa Puting Bunbon. Unya miluom ko paghilak dihang nakaamgo ko nga wala na gayud si Amayang. Nabuhi lang siya sa akong paghandom, kay ang paghandom way utlanan. (KATAPUSAN)