Kalamboan sa Tuig 2019
Bag-o. Ang Tuig 2019 matod pa sa kalendaryo sa Chinese mao ang Tuig sa Baboy kon Year of the Pig. Matod pa, ang baboy maoy simbolo sa kaadunahan. Manghinaut ta nga ning Tuig 2019 molambo ang atong nasud ingon man ang atong kaugalingon di lang sa bahandi apan lakip na ang maayong gawi.
Manghinaut usab ta nga wa nay mga katalagman pa nga moabot ug nga walay dakong kadaut nga mahitabo.
Daghan nga mga kalamboan ang atong mapaabot sa Tuig 2019. Usa niini ang gisaad ni Cong. Raul del Mar sa pag-amendar sa RA 4136 kon Land Transportation and Traffic Code nga nagdili nga himuon nga depasaheroan ang motorsiklo basi sa Section 3, paragraph (b). Mao ni ang probisyon sa RA 4136 nga gisaad ni Congressman Del Mar nga iyang amendahan igbalik sa sesyon sa kongreso.
Apan wa mopasalig si Congressman Del Mar tungod kay matod pa niya dunay 14 na lang ka sesyon ang kongreso ug motapos na ang ilang termino tungod kay magpiliay na man sa Mayo 13, 2019. Dunay purohan nga mapasar sa komitiba ug sa kamara baha ang pag-amendar sa RA 4136 apan di makapasalig si Del Mar nga maaprobahan igabot didto sa senado. Mobalik ang kongreso sa Enero 14 ug moundang sa Pebrero 9, 2019.
Atong mahinumduman nga sa dihang mosugod na unta ang operasyon sa Angkas gipugngan sa Department of Transporation (DOTr) tungod sa balaod nga nadili nga himuon nga depasaheroan ang motorsiklo. Gani, ipadakop sila og mamasahero. Nahimong kataw-anan ang aksyon sa DOTr kay dugay na kaayo ang habal-habal nga namasahero apan wa dakpa.
Karon, morag nahug nga naamong ang mga habal-habal sa Angkas.Tungod sa ilang kahimtang ang dakbayan sa Sugbo pinaagi ni Mayor Tomas Osmeña mohatag og hinabang nga bugas sa mga sakop sa Angkas ug habal-habal. Gisaway sa oposisyon nga usa ka pamulitika ang gibuhat ni Mayor Tomas.
Di kalikayan nga dunay mosakay sa isyu labina sa nagkaduol nga piliay sa Mayo 13, 2019. Niadtong Dec. 23 nagpahigayon si Mayor Tomas og usa ka misa diha sa City Sports Center nga si Arsobispo Palma ang nagmisa diin duolan sa 7,000 nga drayber sa Angkas ug habal-habal ang miatender. Sa kadaghan sa nanambong sa maong misa angayan gyud nga sawayon sa kaatbang sa pulitika ni Mayor Tomas.
Ang lain nga kaayohan nga atong mapaabot sa sunod tuig mao ang mga mehoras gikan sa Malakanyang sama sa bag-o nga highway nga motadlas sa kabukiran gikan sa Naga city hangtud sa Danao city ug ang giingon nga ika-upat nga tulay nga mosumpay sa Consolacion ngadto sa Lapu-Lapu City. Atong panghinauton nga matuman ning tanan. Maayong pag-abot Tuig 2019!