GISUKMAG NAMATAY

ULO SA 43 ANYOS NGA LALAKE NAPANTOK; ANAK SA KAPITAN SA BRGY. SUBA WA NA IGKITA: PULIS

Patay ang usa ka lalake human gisumbag sa anak sa kapitan sa Barangay Suba, Dakbayan sa Sugbo dihang nisuway og badlong sa lalis sa magtiayon buntag sa Enero 1.

Napantok ang ulo ni Richard Almoguera, 43, sa semento. Siya namatay alas 7:15 sa gabii sa samang adlaw sa ospital.

Ang suspek mao si Jomil Sable, anak ni Barangay Kapitan Jojo Sable sa Suba.

Base sa kasayoran nga nakuha sa police station (PS6), si Almoguera nag-inom uban sa iyang mga higala alas 8 sa buntag sa Enero 1 sa dalan Magsaysay sa Suba duol sa pinuy-anan sa mga Sable.

Matod ni SPO1 Ronald Cabrera, ang lead investigator, nga alas 9 na sa gabii niadtong Enero 1 na-blotter sa ilang buhatan ang hitabo human sa pag-report sa inahan ug anak.

“Nag-inom man ni sila pero di ni kauban sila sa inom og kaning anak sa kapitan. Mura ranig nibadlong kuno si Almoguerani Sable kay lage paryente kay gaaway man daw na si Sable ug iyang asawa. So, ngalan nga paryente, hubog-hubog na, basin gikomedya, murag nibadlong mao to nasuko si Sable dala na tingali sa kainit siguro, gisumbag ni. Karon si Almoguera naigo sa apapangig nya natumba kay hubog, napantok ang ulo sa semento,” sigon ni Cabrera.

Ang lugar nahitaboan, adunay kapin o kulang 200 metros ang distansiya gikan sa estasyon sa pulis. Human sila nakakuha og impormasyon, gisusi dayon ni Cabrera si Almoguera sa CHH, apan wa na niya maabti nga buhi human sa internal hemorrhage kun pagdugo sulod sa iyang ulo nga napantok sa semento.

Ang bayranan sa tambalanan lakip na ang mga doctor nga maoy nagtambal kang Almoguera giangkon ni Kapitan Sable, sumala pa sa pulis.

“Nakahibalo na ang estation pagkagabii na. Pero parte atong sinumbagay nila, wala jud. Diha ra nigawas ang report pagkamatay sa biktima, pagkamatay na sa gisumbag. Alas 9 na sa gabii mao pa gyud pagkahibalo diri sa estation parte ana,” matod niya.

Si Cabrera kinsa niadto usab sa crime scene ug nanguha og kasayuran, apan wa na makakuha og igo nga mga impormasyon sanglit way nisaksi sa krimen.

Ang batan-ong Sable wala na usab sa ilang barangay ug wala masayod ang mga pulis kon asa kini nagtago-tago.

Miingon usab siya nga walay plano ang pamilya ni Almoguera nga ipahibawo ang nahitabo tungod paryente ra ang duha.

“Wala gyud silay plano magpahibaw diri kon wa pa namatay ang biktima kay lagi paryente ra man. Nya sigon sa nakuha nga impormasyon, during sa pag-admit sa biktima, giangkon sa kapitan ang gastohan kay wa man jud to sila ga expect nga mamatay. Diha ra jud nigawas adtong pagkamatay,” ingon ni Cabrera sa Superbalita Cebu.

Gipasabot niya nga wa sila makahimo og hot pursuit operation batok ni Jomil sanglit wa silay personal knowledge ug wa say mga tawo nga nisumbong kanila atol sa insidente.

Ang Superbalita Cebu nisuway og tawag kang Kapitan Sable ug sa iyang anak nga si Jomil apan ang ilang mga telepono pulos dili na makontak.

Gitawagan sab ang barangay hall, apan wa sab didto ang pangulo sa baranagy aron unta kuhaan sa ilang pamahayag.

Si Chief Inspector Henrix Bancoleta, hepe sa Station 6, niingon nga naghuwat sila sa pamilya ni Almoguera nga moduso sa ilang reklamo ug andam silang motabang para mapasakaan og kasong homicide si Jomil Sable. Matod ni Cabrera, magtagbo pa ang pamilya aron desisyunan unsay ilang lakang nga himuon. /