IAMPO KANUNAY SI DUTERTE: BISHOP PALMA
Gawas sa pagpasalamat sa mga grasya nga nadawat sag miaging tuig, giawhag sa amahan sa simbahang Katoliko ang manimbahay sa padayon nga pag-ampo alang sa pangulo sa nasud, Presidente Rodrigo Duterte.
Matod ni Cebu Archbishop Jose Palma nga aduna may mga yabag (di maayo nga pamulong) nga gipanulti ang Presidente.
Iyang hangyo sa publiko nga di na lang kini abibahan.
“Pray for him. Naay mga yabag iyang gipanulti noh, sa akong point kung sa music pa, naay tawo mokanta og yabag, pagpakpaki, kay ang iyang huna-huna maayo ang iyang pagkanta, gipakpakan siya. Paminawa lang (Duterte) but don’t applaud kon yabag. Above all, we pray for him,” matod ni Palma ngadto sa mga tigbalita, human sa santos nga misa alang sa pagsugat sa Bag-ong Tuig niadtong Lunes sa gabii.
Gidugang ni Palma nga bisan daghang gipamulong si Duterte nga bati batok sa kaparian ug sa simbahang Katoliko, aduna gihapoy mga programa niini nga sila sa Cebu Archdiocese mismo nisuporta, sama sa programa batol ilegal nga drugas.
“I do believe the grace of God will touch him and also all of us. Kita we cooperate and support in his good projects, especially drug rehabilitation, we sacrifice and give sources,” dugang sa Arsobispo.
Hinungdan nga anaa ang Surrender to God (SuGod), nagtabang sa mga adik sa drugas nga buot na nga hingpit mag-bag-o ug di na mobalik sa maong bisyo. Ang SuGod, aduna na kapin sa libuan ka mga graduate niini.
Atol sa iyang wali, halos puros pasalamat ang iyang pahinumdom sa mga manimbahay.
Dako ang pasalamat ni Palma nga sa niaging tuig gihatagan og bili sila nga kaparian, human nga Year of the Clergy and consecrated persons, ang gitagana sa tibuok 2018 sa simbahang Katoliko.
Ilabi na sa gihimo nga panagtigum sa mga pari niadtong Agusto 20-24, nga gipahinumduman sila sa ilang misyon sa pagpangalagad ug di ang magpaalagad, ang mga pagtulun-an nga ihatud ngadto sa katawhan ug uban pa.
Matod ni Palma nga angay lang usab ang pagpasalamat sa mahal nga Birhen Maria, kinsa nisugot nga ipakatawo ang manunubos sa katawhan. Pasalamatan ang Ginuo sa dako niini nga gugma sa mga tawo, hinungdan nga gipada ang anak, si Sr. Sto. Nino.