P400M SHABU NASAKMIT SA 2018

Moabot sa dul-an P400 million nga balor sa drugas ang nasakmit sa Cebu City Police Office (CCPO) sud sa usa ka tuig nga anti drug operations gikan sa Enero 1, 2018 hangtod Disyembre 31, 2018.

Sa datus nga gipakita ni CCPO Director Sr. Supt. Royina Garma nga sa 2,564 ka anti drug operations, 3,953 niini ang nangadakpan, diin 2,833 ang drug user ug 1,120 ang drug pusher.

Moabot og 11 lang ang namatay sa police operations, lima niini drug users ug unom ang drug pushers.

Nakasakmit silag 39,558.52 grams nga gituohang shabu nga mobalor og P389,325,586.

Samtang nakatala usab silag 2,113 ka tawo ang nadakpan sa kampanya batok sa illegal nga sugal ug moabot usab sa P157,016 ang nasakmit nga kwarta.

Nagsugod ang dinaghan nga nasakmit sa kapulisan ning hinapos nga bahin sa 2018 diin kinilo na nga gituohang shabu ang ilang makuha gikan sa mga bag-ong drug player.

Ning pagsulod sa 2019, hingusgan pa ni Garma ang ilang gubat batok sa illegal nga drugas.

Apan iyang giklaro nga di siya makasiguro kon wa nay mamatay nga mga drug personalities atol sa ilang ilusad nga anti drug operation.

Iyang gipasabot nga daghang mga pagpangronda ang gihimo sa mga police stations ang way kinabuhi nga nakalas tungod kay wa mosukol ang ilang target.

Gawas sa pagtutok sa ilegal nga drugas karong 2019, ila usab hingusgan ang loose firearms ilabi na nga nagkaduol na ang midterm elections.

Aduna nay listahan ang CCPO sa mga gun holder nga ipaubos nila sa Oplan Katok sa mosunod nga mga adlaw nga moabot ngadto sa kapin 4,000.

Gawas sa mga civilian nga adunay armas nga wa na ma renew ang lisensya, aduna usay elected officials.

Ipasusi ni Garma kon sa 4,000 nga lista, pila ang nagpuyo sa syudad ug lalawigan sa Sugbo.

Mahimo nga itahan ang maong mga armas o kaha modangop sa labing duol nga police station alang sa pag renew sa mga papeles niini.

Gipahimangnoan usab ang mga gun holder nga nibaligya sa ilang armas sa laing tawo nga wa pa maasikaso ang lisensya. /