Pinunitan nga mga paboto nakaangol

Kon aduna pay makit-an nga mga salin-salin nga pabuto sa New Year’s eve sa kadalanan, pahimangno sa kapulisan, ilabi na sa mga bata, nga di kini puniton.

Human nga tulo sa 10 ka mga natala nga angol sa dakbayan sa Lapu-Lapu ug siyudad sa Mandaue nga nabiktima sa pabuto atol sa pagsugat sa Bag-ong Tuig hangtod na sa unang adlaw sa 2019, ang gipamunit nga pabuto sa dan ang nakaingon.

“Mas maayo gyud nga di nalang manguryuso kalabot niining mga pabuto, ayaw na tawn ninyo na pamunita. Naa gud gyuy mga kaso sa una nga after 6 days human sa pagsugat sa New Year, naa pa gihapon mabiktima sa pabuto tungod anang pagpamunit. Di gyud na kakompyansaan,” pahimangno ni Police Senior Supt. Julian Entoma, director sa MCPO.

Kini human nga duha sa tulo ka mga natala nga biktima sa pabuto sa Mandaue, nahitabo alas 3 sa hapon sa Enero 1, nabuthan ang 13 ug 11 anyos nga namunit og pabuto sa dan sa Barangay Casuntingan.

Minor injuries lang ang naangkon.

Ang ikatulo nga nabiktima sa pabuto sa Mandaue City ang usa ka sais anyos, human nga wa malabay dayon ang pabuto niadtong ala 1 sa kaadlawon sa Enero 1.

Ang laing pito sa nabiktima sa pabuto ang gikan sa dakbayan sa Lapu-lapu, diin nagpanuigon og 9 anyos ngadto sa 30 anyos ang nakaangkon og minor injuries.

Matod ni Police Senior Supt. Limuel Obon, director sa Lapu-Lapu City Police Office, nga wa untay na-blotter sa ilang mga police station, hinungdan nga sila na mismo mga pulis ang nipakisayod sa mga tambalanan sa syudad.

Kasagaran sa mga nabiktima mao kadtong wa dayon malabay ang pabuto human gidagkutan, kwitis nga wa natarong

paghikot sa kawayan, hinungdan nga didto napabuto sa silingang nagtan-aw.

Aduna tanan 14 ka mga biktima sa pabuto sukad niadting Pasko hangtud Martes, Enero 1, sa syudad sa Lapu-lapu.

Samtang mobalor sa P30,000 sa mga pabuto ang nakompiskar sa kapulisan sa LLCPO sukad niadtong Disyembre 30 hangtud sa New year’s eve.

Gawas sa mga nabuthan sa pabuto, wala nay natala nga mga krimen ug bisan ginagmay nga insidente sa LapuLapu atol sa pagsugat sa tuig 2019.

“Nakita nato nga disiplinado ang Oponganon, gawas lang atong kalabot sa paggamit sa pabuto. Siguro naminaw sila sa ato kanunay nga panawagan, inabagan sad sa LGU, sa kabarangayan. We can say that we are generally peaceful ato pagsugat sa New Year,” matod ni Obon ngadto sa Superbalita Cebu.