Kampyon sa habalhabal

Kon aduna may matawag nga “kampeyon sa habal-habal’ dinhi sa ato wala nay lain kon dili si Cebu City north district Congressman Raul del Mar. Gumikan kay usa siya sa mga kongresista nga nangamahan og balaodnon nga mag-legalize sa Angkas ug habal-habal. Ayaw mog tuo anang ubang mga pulitiko nga misaad nga motabang kunuhay. Gitonto lang mo.

Ang Republic Act 4136 kon Transportation Code and Traffic Rules of the Philippines nagdili sa mga motorsiklo nga gamiton sa pagpamasahero. Busa, illegal kining Angkas ug habal-habal. Mao kini karon ang hinungdan nga gihingushan sa taga LTO, LTFRB ug sa kapulisan ang pagdakop niining maong matang sa transportasyon.

Nunot usab kini sa desisyon sa Korte Suprema nga mipagawas og temporary restraining order batok sa Angkas. Ilegal ang Angkas ug napagan lang usab ang habal-habal kay morag gi-tolerate o gipasagdan lang ang operasyon niini kay nakatabang man lagi sa mga pasahero labi pa sa kabukiran.

Ubos sa balaodnon ni Del Mar, House Bill 6909, iyang pa-amendahan ang RA 4136 aron magtugot na unya nga legal nga maka-operate ang motorcycles-for-hire. Iya usab nga paga-amendahan ang section 458 (1)(V1) sa Republic Act 7160 kon the Local Government Code of the Philippines aron magtugot sa mga local government units nga ma-apil ang mga motorcycles for hire nga ma-isyuhan og prangkisa sama sa mga pedicab ug aron legal na kining maka-operate.

Niadtong 2017 pa gisangat ni Del Mar ang maong balaodnon ug miagi na kini og hearing sa committee level. Kon mapasar pagatawgon kini og Motorcycles for hire of 2017. Wala hinuon mipasalig si Del Mar nga mapasar kini dayon gumikan sa kahagip-ot na sa panahon. Mag-recess na ang Kongreso karong Pebrero. Unya aduna pay version sa Senado. Pero kining maong balaodnon maoy motubag sa problema sa habal-habal aron mahimong legal. Si Del Mar maoy angayan nga tawgon nga “kampyon sa habal-habal” ug dili nang tawo diha sa City Hall nga walay lain gihimo ko kon dili pangilad lang.