New Year’s love
Sa pagsulti ni Joyce nako nga mibalik si Nero sa seminaryo, morag gusto kong mohilak. Naunsa ba ko, uy? Hilom kong nakaingon. Wa gyud ko makasabot sa akong gibati ngadto kang Nero. Apan wa ko ipakita kang Joyce ang gibati ko niadtong tungora.
Nanuaw mi sa lubong ni Mayro niadtong tungora. Naghalad kog mga buwak sa iyang nitso, nagdagkot og mga kandela ug nag-ampo alang sa kalinaw sa iyang kalag.
Kon unsa kakalit sa paggawas ni Kuya Nero sa seminaryo, Te Lenlen, mao sab ang kakalit sa iyang pagbalik didto sa seminaryo. May nasulti ka ba niya nga nakapahiubos niya, Te?”
Miginhawa ko, gusto kong mawala ang kahuot sa akong dughan. Niadtong tungora nanggawas na mi si Joyce sa sementeryo.
“Ako man lang siyang giingnan nga lisod ilisan si Mayro sa akong kasingkasing tungod sa dako kong love ani. Naghilak man gani ko sa iyang atubangan.”
“Di na tingali siya gusto nga samukon ka, Te Lenlen.”
Naghilom na lang ko. Gipamatyag ko ang unsa man nga diha ron sa akong hunahuna ug sa akong kasingkasing. Milabay pa ang mga adlaw. Usa ka gabii, giduaw ko ni Joyce. Malipayon kaayo siya. Nahibulong ko sa kalit niyang pag-abot sa among balay. Nagtapad mig lingkod sa taas nga sopa.
“You know, Te Lenlen, nia na si Kuya Nero. Hingpit na siyang migawas sa seminaryo. Mao diay nga mibalik siya sa seminaryo aron ipasabot sa ilang dako didto nga mogawas na gyud siya sa seminaryo tungod kay nakaseguro na siya nga love ka gyud niya.”
Wa ko makatingog. Kusog kaayo ang pagbutuk-butok sa akong dughan. Unya naabli ang pultahan sa sala. Misulod si Nero nga nag-smile. Milingkod siya sa among atbang ni Joyce.
“Sige, ha, biyaan una ko kamong duha.”
Wa pa gani ko makatubag, mibiya na si Joyce sa sala. Mitapad paglingkod si Nero nako. Seryuso na siya kaayo.
“Now, tell me, Lenlen, kon wa ka ba gyuy nabatyagang pagmahal nako, ug di na ko magpakita nimo hangtod sa hangtod.”
Morag naglisod ko pagginhwa niadtong tungora. Nakakupot ko sa kamot ni Nero.
“Sa imong pagbalik sa seminaryo, naguol kaayo ko, Ner. Abi kog di ka na magpakita nako.”
Nakagakos ko kang Nero nga migakos sab nako.