KAWHI GABANGIS

Parehong niposte og ilang tagsatagsa ka career-high sila si Kawhi Leonard ug Paskal Siakcam aron agakon ang host Toronto Raptors ngadto sa kadaugan batok sa Utah Jazz, 122-116, kagahapon sa National Basketball Association (NBA).

Si Leonard nimugna og 45 puntos aron pangulohan ang kadaugan samtang niamot og 28 puntos si Siakam.

“That’s good, we all got to witness that live and in person,” matod ni Raptors coach Nick Nurse kabahin sa kabangis sa duwa ni Leonard.

“He was phenomenal. I’ve kind of been waiting for one of these nights where he makes them all.”

Ang Raptors, nga ningpahugot sa ilang paggunit sa overall leadership dala ang 28-11 nga rekord, mingrehistro sa ikaupat nilang sunodsunod nga kadaugan sulod sa ilang balwarte bisan wala ang duha sa ilang mga pambato nga sila si pointguard Kyle Lowry ug center Jonas Valanciunas.

Si Lowry adunay gipamating sakit sa iyang likod samtang si Valancuinas adunay piang sa iyang wa nga kumagko.

Nasipyat man tuod siya sa iyang tanang tulo ka threepoint shots apan mibawi si Leonard sa fieldgoal diin mitali siya og 16-of-22 unya mirehistro sab siya og 13-of-17 sa freethrow line.

“I try to stay in the moment and keep competing every possession and not worry about myself, just try to get a team win,” batbat ni Leonard.

Sa kinatibuk-an, ikatulo pa lang kini nga duwa nga nakahimo si Leonard og 40 puntos o labaw pa unya ika-14 kining sunodsunod nga duwa nga nakamugna siya og labing ubos 20 puntos.

Ang Jazz, nga nahagsa sa 1820 nga rekord, gipangulohan ni jae Crowder pinaagi sa iyang career-high nga 30 puntos, nihatag og 21 puntos si Derrick Favors samtang niamot og 19 puntos si Donovan Mitchell.

“Jae was hot. It’s unfortunate that we didn’t capitalize on the night that he had,” asoy ni Jazz coach Quin Snyder.