Japanese kickboxer katulo gipatumba ni Mayweather
Nagkinahanglan lang og kapin sa duha ka mga minutos si boxing legend Floyd Mayweather Jr. aron idespatsar si Japanese kickboxer Tenshin Nasukawa sa usa ka exhibition bout niadtong Lunes atol sa bisperas sa Bag-ong Tuig sa Tokyo, Japan.
Katulo gipalukapa ni Mayweather si Nasukawa una miitsa og tualya ang amahan sa usa sa labing bantugang kickboxer sa Japan sa ika 1:40 minutos sa away.
Bisan dali ra nga nahuman ang away, tataw nga mas maayo ang abilidad ni Mayweather.
Pagkahuman sa away, gigakos ni Mayweather si Nasukawa ug gitawag gihapon kini niya ang “still a great champion.”
Si Nasukawa wala nakapalusot og kumo sa mas taas og kasinatian nga si Mayweather kon boksing ang hisgutan.
Ang away, nga giorganisar sa The Rizin Fighting Federation, nagsunod sa lagda sa boksing ug dili ra makaapekto ang resulta niini sa rekord sa duha ka fighters.
“Tenshin is still undefeated. I’m still undefeated,” matod ni Mayweather, kinsa adunay 50-0 nga rekord sa boksing.
“It’s all about having fun. I told Tenshin to ‘hold your head up high.’”
Human sa away, si Nasukawa nipadayag nga mapasalamaton siyang ning maong oportunidad.
“He is first class,” batbat ni Nasukawa.
Giklaro ni Mayweather nga bisan midawat siya ning awaya, wala kini nagpasabot nga segurado na ang iyang paglugnot gikan sa pagretiro sa boksing.