Wala’y unay: Team Nietes
Human nalangkat ni ALA fighter Donnie “Ahas” Nietes ang bakanteng World Boxing Organization (WBO) super flyweight title nga nagpahimo kaniyang 4-division world champion, sangko seguro sa laingit ang naghuwat nga dagkong mga oportunidad alang kaniya.
Si ALA stable head trainer ug matchmaker Edito Villamor mitataw nga tanang dagkong mga away nga nag-atang kang Nietes puwede nilang hatagan og konsiderasyon gawas lang sa usa – ang pagpakigbatok sa kababayang si International Boxing Federation (IBF) super flyweight king Jerwin “Pretty boy” Ancajas.
Gipasabot ni Villamor nga sila si Nietes ug Ancajas parehong world champions ug dili maayong mag-unay sila sa usa ka world unification bout sa rason nga seguradong matangtangan og usa ka world champion ang Pilipinas.
Niadtong Septiyembre sa miaging tuig, si Nietes nakigbatok sa kababayang si Aston Palicte alang sa inilugay sa bakanteng WBO super flyweight title apan giklaro ni Villamor nga dili malikayan ang maong panag-away gumikan kay ilugay man kini sa bakanteng world title.
“Kon mag-unay gud sila si Donnie ug Jerwin, for sure makuhaan ta og usa ka world
champion imbes duha. Katong Palicte fight, naa man gyud to’y significance kay ilog man to sa vacant world title,’ pasabot ni Villamor.
Alang kang Villamor, ang labing dakong away ni Nietes mao ang pagpakigbatok kang World Boxing Council (WBC) super flyweight champion Srisaket Sor Runvisai, usa ka boxing superstar sa Thailand.