MGA PULIS NGA PROTEKTOR NAILHAN NA
Nailhan na ang pipila ka mga pulis nga giingong protektor sa kanhi sinaligan ni Franz Sabalones, self confessed drug lord sa Sugbo.
Si Tocelio Ababon, kinsa nadakpan sa Provincial Drug Enforcement Unit sa sitio Bilibid barangay Casay lungsod sa Argao, nihatag og mga ngan sa kapulisan.
Usa ka kasaligang tinubdan sa Superbalita Cebu nga nihangyong di nganlan, nagkanayon nga ang mga ngalan sa maong mga pulis naduso na sa buhatan ni Police Regional Office (PRO) 7 Director Chief Supt. Debold Sinas alang sa validation.
Giingong ubos og mga rango sa maong mga police, apan nihangyo ang tinubdan nga di lang ibutyag kon unsa nga unit sa Philippine Nationalo Police (PNP) dinhi sa Sugboi nahisakop.
Apan ang usa sa mga gitug-an ni Ababon nga pulis napatay duol sa siyudad sa Talisay samtang ang laing duha naa sa laing buhatan sa kapulisan ug aktibo pa sa serbisyo sa Metro Cebu.
NASAKMIT
Kapin sa P2 milyunes nga balor sa illegal drugs nasakmit sa Mambaling police station atol sa buy bust operation niadtong Miyerkules sa alas 10:35 sa gabii, Enero 2, sa sitio Tugas, Barangay Mambaling gikan sa usa ka bag-o lang nakagawas sa Cebu City Jail.
Ang nasikop mao si Ivan Matig-a, 25, kinsa nagpuyo ra usab sa sitio Tugas ug nakuhaan og 305 gramos nga gituohang shabu nga gibana-bana nga mobalor ang tanan sa P2,074,000.
Nakuha sa kapulisan kaniya ang 11 ka dagkong pakete ug laing lima pa ka medium packs nga gipaubos na karon sa imbestigasyon sa Mambaling police station.
Matod ni Chief Insp. Randy Caballes, hepe sa Mambaling police, nga niadtong 2016 nadakpan na si Matig-a human mapalitig drugas sa mga pulis.
“Kining subject, Sir, kini si Ivan, bag-ong laya ni siya. Mga
two weeks o mga one week kapin pa ni siya nakagawas. Drugs gihapon then nakadawat tag report nibalik nig duwa, so, naka
buy bust ta,” matod ni Caballes. Dugang ni Caballes nga makabaligya si Matig-a og tunga sa kilo matag semana diin ang iyang contact naa sa sulod sa Cebu City Jail nga iyang nakauban sulod sa duha ka tuig.
Daghan kinig gipang tug-an sa kapulisan nganong padayon nga maka negosyo ang mga drug pusher sa sulod sa bilanggoan. Tungod sa maong impormasyon adunay himuon nga follow up operation ang Mambaling police station sa mosunod nga mga adlaw.
5 NADAKPAN
Nasikop ang lima ka mga durugista atol sa roving sa Sitio Neighborhood, Bgry. Tabunok, Talisay, City, Cebu Huwebes sa alas 4 sa kaadlawon, Enero 3.
Nailhan sa kapolisan sa Talisay ang lima ka mga suspek nga sila si Cleart Escalante, 22; Rey Mangubat, 42,; Jose Diaz, 38; ug ang duha ka managsuon nga sila si Jury, 40; ug Jemcy Abella, 36.
Ang lima ka mga suspek lumad sa Sitio Neighborhood, brgy. Tabunok Talisay.
Nagkanayon si SPO4 Tim Soreño nga ang kapolisan sa Talisay adunay operasyon sa brgy. Tangke apan false alarm.
Ang kapolisan ming balhin pag roving sa Brgy. Tabunok hinungdan na nasakpan ang lima.
“Pagsulod sa polis sa maong area ilang gipanglabay ang mga shabu ug nakita kini sa mga responding officers,” dugang ni Soreño.
Gipanglabay sa mga durugista ang mga shabu pagkabantay nila nga adunay mga polis na nag-roving.
Matod pa ni Soreño na ang mga durugista na shock tungod kay wala sila magtuo nga mo-roving ang mga pulis. Wala makadagan ang mga
suspect tungod sa ilang pagka shock hinungdan na gidakop kini dayon sa mga pulis. /