Barkong pasaheroan sakyan sa imahen ni Sr. Sto. Niño

Sa unang higayon, ang barko sa usa ka shipping company ang sakyan sa mga imahen sa Señor Sto. Niño ug Birhen sa Guadalupe atol sa fluvial procession karong tuiga.

Si Padre Ric Anthony Reyes, secretary sa fiesta committee sa kapistahan sa Señor Sto. Niño karong 2019, nikompirmar nga ang Roble Shipping Lines ang nabunotan sa rapol karong tuiga nga maoy mangandam sa barko nga himuong galleon ug luwanan sa duha ka balaang mga imahen sa procession sa kadagatan karong Enero 19 gikan sa siyudad sa Lapu-Lapu pabalik sa dakbayan sa Sugbo.

Matod niya, dunay laing upat ka mga kompaniya og barko ang apil usab sa mga gipilian diin usa sa ilang gitan-aw ang kapasidad niini nga makapasakay og daghang mga tawo nga mouban sa procession.

“They (Roble) said they have already chosen from their (vessels) kay nag-decide man sila sa ilang family what to use,” pahayag ni Reyes dihang nahinabi sa Superbalita Cebu pagka Huwebes, Enero 3.

Wa na siya motug-an kon unsa ang laing mga kompanya nga nisalmot sa draw by lots karong tuiga.

“It is our understanding nga dili lang namo i-reveal so that dili bitaw ma-misinterpret. So, mao na siya we will just keep secrecy of the lots and reveal only the one nga among nadrawn or among nahulbotan,” sigon ni Reyes.

Sa miaging tuig, ang barko sa Philippine Navy ang gisakyan sa mga imahen atol sa fluvial procession human nakahukom ang kapariang Agustino sa Basilica Minore del Sto. Niño nga hatagan og higayon ang ubang mga nanag-iya og mga barko nga kini ipasakay sa pagdala og balik sa siyudad sa Sugbo.

Sud sa 37 ka tuig, ang banay ni Ernesto C. Ouano Sr., ang kanunay mo-host ug mangandam sa galleon sa matag procession, usa ka adlaw sa dili pa ang kapistahan sa milagrusong bata.

Niadtong 2018, ang fluvial procession nagsugod sa Naval Forces Central (Navforcen) sa Barangay Looc, Lapu-Lapu.

Karong tuiga, sa Muelle Osmeña sa Lapu-Lapu gihapon manukad ang procession sa kadagatan nga magsugod sa alas 6 sa buntag.